En una calendata prou especial ta totz y todas las aragonesas, o 23 d’abril Diya d’Aragón, o Centro Civico Delicias de Zaragoza acullirá un concierto an que l’Asociación Cultural Nogara – Religada nos convida “a todas y totz a celebrar con nusatras istos 25 anyos de faina”.
A las 19.00h La Ronda de Boltaña trayerá a suya mosica sobrarbenca, con as nuevas cantas d’o suyo disco “La huella que el tiempo deja”, y también “os clasicos que tanto hemos cantau totz y todas”. Seguidament Comando Cucaracha continará con a borina con a suya mosica mestiza an que barracha folk, rock, reggae, ska y tot lo que les agane. O concierto rematará con as asperadas Prau, qui tornan t’os scenarios dimpués de muito tiempo de silencio, plens de ganas de fer-nos blincar, y puet estar que con bella sorpresa.
As chornadas d’as luengas d’Aragón feitas por Nogara, que fan en 2016 a suya XXIII edición, han contau iste anyo con un total de 10 actividatz, an que antimás de charradas arredol d’o nuestro patrimonio lingüistico, i habió un concierto acustico y una visita guidada por l’Alchafaría.
Amás, o pasau 16 d’abril o parque Bruil de Zaragoza acullió “A tot estrús”, a chornada esportiva por un Aragón trilingüe. Nogara tamién ha quiesto fer alcordanza d’a suya revista d’actualidat de raso en aragonés “O Espiello”, con un numer especial an que repasan muitos aspectos de l’aragones. Asinas, cal recordar que Nogara también ha lanzau a biera conmemorativa Religada.
“En totz istos meses, dende aquella devantadera d’o curso en setiembre, hemos iu animando-tos a participar en a campanya de #Nogara25anyos. Todas ixas fotos, videos y mensaches que hetz compartiu con nusatras, ferán parte d’un video que se presentará en ixa mesma chornada d’o 23 d’abril”, rematan dende Nogara.
