606 presas y presos politicos vascos bi ha actualment arredol de 84 garcholas, entre l’Estau espanyol y francés, d’os quals 224 deberían estar exgarcholaus por malotias graus u por haber cumpliu ya la condena que ha estau enamplada como castigo por a sentencia 197/2006 de 28/02/2006 d’o Tribunal Supremo, mas conoixida como doctrina Parot, pese t’as numerosas sentencias d’o Tribunal d’Estrasburgo que condenan a l’Estau espanyol por vulnerar os dreitos humanos. A gran parti no tien delitos de sangre, ni son miembros de garra organización armada, nomas son ciudadanas y ciudadans comprometius y militants de organizacions politicas, chovenils, sindicals y socials.
800 kilometros ye a meya de distancia que tien que recorrer familiars, amigas y vecinas d’as presas y presos ta visitar-les dende os suyos lugars d’orichen, castigando d’ista traza a familiars fendo viaches, alto u baixo, de mil kilometros ta viyer-les durante unos poquetz menutos estando muitas vegadas humillaus con cacheos y rechistros antis d’a suya visita. Lyon, Huelva, Clairveaux, Murcia, Joux La Ville, Almeria, son bells eixemplos d’os destins habituals d’a dispersión.
A movilización cheneral popular convocada por Herrira o sabado 12 de chenero trascurrió gran parti d’o recorriu en silencio, que yera crebau de cabo quan con un chilo “Euskal presoak, Euskal herrira” u “Presoak kalera, Amnistia osoa”. 115.000 ciudadanas y ciudadans seguntes a organización caminoron por as carreras de Bilbao demandando o fin a ista politica penitenciaria, entre ells una delegación aragonesa que chunto a companyers y companyeras d’Erribera (Nafarroa) se dixo viyer, y estio aplaudida y vitoreada durante tot lo recorriu. Una marcha que trascurrió entre a plevia pero que no impidió as calurosas muestras de solidaridat de chent que veniba de totz os lugarichons d’Euskal Herria.
Especial recuerdo bi habio t’as tres activistas kurdas asesinadas fa unos diyas en París, asinas como t’a chovenalla independentista vasca que contina sufrindo a represión, ye o caso d’a recient sentencia contra os cinco chovens de Oarsoaldea y uno de Donostia, u os quatro de Burlata que en breus tendrán o chuicio an demandan 76 anyos de garchola en total. Varias pancartas citaban ya a reclamar os dreitos civils y politicos o 19 de chenero en Donostia.
Por tot ello, a chovenalla independentista aragonesa amostramos a nuestra solidaridat internacionalista con os presos y presas politicas vascas o pasau diya 12, dende aquí, dende Aragón femos un compromis a denunciar a contina vulneración de dreitos en as garcholas espanyolas y a fer servir totz os espacios que sigan menester ta reclamar a suya puesta en libertat. Tornamos con as pilas enchegadas dimpués de viyer o compromis y sentimiento con que os y as nuestras chirmanas vascas son luitando, no podrán aturar-nos.
Libertat presos y presas politicas, presos a casa vuestra ya!
A solidaridat ye a nuestra millor arma!
