Lo reto Inktober empecipió en 2009 quan lo dibuixant Jake Parker se proposó fer un dibuixo a tinta cada diya d'o mes como una manera d'amillorar las suyas estrucias. China-chana fue creixendo y una decada dimpués ye un fenomeno global a on que s'embrecan artistas de tot lo mundo.
En lo mundo d'a literatura, lo Inktober se gosa d'implementar en forma de microrrelatos. En lo caso de l'aragonés, Carlos G. Esteban ye lo primer autor en completar lo reto en publicar en lo suyo blog una entrada cada diya con un microrrelato. Los textos levan lo titol d'as parolas que se proposan cada diya y que sirven como disparador creativo. En istas 31 historias se i puet trobar de tot: dende la envista d'un veteran d'a segunda guerra mundial a un penyista de mas de quaranta anyos que quier seguir sentindo-se choven, una aventura en lo Himalaya, un yayo que se troba con un pato machico u lo zaguer supervivient d'una Zaragoza post-apocaliptica.
Antimás d'istos 31 relatos, Carlos G. Esteban n'ha publicau qualques mas en lo suyo blog. Ye l'autor tamién de Parola de Follet, publicau iste mes de mayo y que replega nueu relatos de fantasía a on que reinventa beluns d'os sers d'a mitolochía aragonesa como folletz, fadas y diaplerons. Chunto con Tamara Marzo Rins publicó en 2011 Prou prou luen, quatre cuentos d'educación medioambiental ambientaus en Aragón.
Totz los relatos d'o Inktober 2019 se pueden leyer en: http://barrenau.blogspot.com/search/label/Inktober2019
