El bando constitucionalista ha puesto la bayoneta encima de la mesa desde el día uno. Y no digo los cojones para que no se me tache de carpetovetónico”. La casolidat va querir que, quan yo leyeva esta sofisticada máxima de Cristian Campos en El Español, se cumplise un mes d’atra vision sintomática: la d’un Paseo de la Independencia envolicau en banderas de l’exército.
Como totz sabem, ixe paseo enceta en Plaza Aragon i remata en Plaza España. El 23 d’abril, los aragoneses solévam celebrar el Día —no sé si atrever-me a dir ‘nacional’— d’Aragon. Ixa festividat va ser instituida per las Cortz de Calatayut en l’anyo 1461. El 6 d’abril de 2016, el Ministerio de Hacienda interveniva las cuentas de la Diputación General de Aragón.
Hasta quán mo’l dixaran celebrar? Aspero equivocar-me, pero tanto las políticas d’austeridat quanto el proceso independentista en Catalunya pareixen preludiar una ofensiva recentralizadora de conseqüencias nefastas pa las autonomias més debils, entre las quals se hi troba la nuestra. A medio-llargo pllaço, ixa ofensiva suprimirá en la suya totalidat una autonomia que, per lo demás, lleva décadas sén agredida.
Resulta fundamental, segun penso, dibuixar el contexto pa que puedam saber aón hi estam: no se trata de solucionar res, sino de problematizar. I de fer-lo considerán tres nivels. El primero d’estes nivels é Europa. Una Europa que ha optau per abraçar los postulaus més crudos del neoliberalismo crebán los estaus del benestar i alentán l’ascenso de partius políticos xenófobos quan no directament neonazis. Esta Europa, me temo, ha veniu pa quedar-se-hie. El segundo d’estes nivels é Espanya. Una Espanya que arrastra totas las carencias de quarenta anyadas de dictadura i de la suya reforma —que no ruptura. Una Espanya, amés, espllentada per Europa enta l’empobrecimiento de las suyas cllases populars i l’autoritarismo del 2008 entavant. El tercero d’estes nivels é Aragon. Los aragoneses som una minoria estructural endentro d’Espanya; los aragonesistas, una minoria endentro del propio Aragón.
L’espanyolismo hi ha calau fondo en la nuestra tierra mercet a la catalanofobia i l’asimilacion forçosa u voluntaria. El hem perdiu tot u casi tot i —el victimismo mai é bueno— muy a soben tamé mo’l hem dixau perder. Que muitos aragoneses se mostren hostils a, per exempllo, la proteccion de las dos llenguas propias no é pas culpa de Madrit. Reconoixcam-lo: no podem construir la casa pel tellau. Som minoritarios, i la casa se mos hi ha afuniu. L’obchectivo inmediato, per tanto, é articular un movimiento amplio que, obligatoriament, deberá acudir a la hue tan manida transversalidat pa ser una mica menos minoritario. Ya hi tenim personas comprometidas i organiçacions muy valiosas pa fer-lo.
Cal elaborar un compromiso de mínimos, un punto de partida asequible: creigo que el desarrollo pleno del nuestro estatuto d’autonomia tal i como se preveyeva lo’n é. Cal baixar a explicar-le-ne a la chent senyalán las implicacions concretas. I cal, sobre tot, no oblidar-mo-ne de las comarcas rurals ni de los llugars perque llugars i comarcas son l’alma del pais. L’alternativa é siniestra: més crisis, més despoblacion i la total destruccion d’Aragon como personalidat política i cultural. Neoliberalismo i bayonetas, pero brenca autonomia.
