ARREDOL | A exalcaldesa de La Muela, María Victoria Pinilla, ha estau declarada culpable por o Chudgau nº2 d’o Penal de Zaragoza d’un delito de prevaricación administrativa, por o que habrá d’estar 8 anyos inhabilitada pa cargo publico, amás de pagar una pinyora de 4,8 millons d’euros.
Amás habrá de pagar tamién a cantidat que se determine por danyos, desperfectos y sustraccions en una urbanización de La Muela. A exalcaldesa se negó a recepcionar as suyas obras. O concello d’ista localidat ha estau declarau responsable civil subsidiario por o total d’iste importe.
En setiembre de 2003 se formó a Chunta de Compensación d’o Sector 1 d’o Plan Cheneral d’Ordenación Urbana d’a citada localidat pa fer una urbanización, que fue aprebada por o concello en 2005.
Manimenos Pinilla no recepcionó as obras como demandó a Chunta de Compensación a finals de 2006, quan ya yeran amanadas a acabar. L’arquitecto municipal consideró que as obras podrían acceptar-se, pero nunca no s’arribó a recepcionar-las por parte de Pinilla.
Pinilla ha estau absuelta d’atro delito de prevaricación pa lo que tamién le’n demandaban 8 anyos d’inhabilitación pa cargo publico.
