ARREDOL | Unas cient personas han muerto en producir-se un accident aerio d’un avión militar Hercules C130 en una zona montanyosa d’a provincia d’Oum al-Bouaghi, en Alcheria, amán d’a muga con Tunicia. O mal orache, con fuerte airera y nieu, podría haber provocau l’accident, en una zona de dificil acceso.
En l’avión volaban 99 pasachers entre militars y familiars, amás de 4 miembros d’a tripulación de l’Hercules. Encara no se sabe si ha puesto haber-ie supervivients, pero as achencias internacionals de noticias dicen que no. L’avión procedeba d’Ouargla y feba honra ta transportar tropas. L’avión se dirichiba enta Constantina, a 50 km. d’o puesto de l’accident.
Seguntes testimonios, l’avión podría haber-se chocau licherament contra una montanya debiu a las malas condicions meteorolochicas. Ye o pior accident aerio en Alcheria dende l’anyo 2003, quan un avión d’Air Algerie s’estozó deixando 102 victimas mortals.
