ARREDOL | Una nueva iniciativa en esfensa de l’aragonés ye prencipiando a mover-se, más que más por os retes socials y o mundo d’a mosica en Aragón. ”A nuestra canta en aragonés” se define como ”un prochecto que mira de empentar a creyación de mosica en luenga aragonesa, sin interés de lucro, nomás con a intención de fer vistera la luenga en a mosica aragonesa d’a mena que sía”.
En bellas cuantas horas dende que prencipió a espardir-se ya han penchau once cantas en a suya pachina web y han recibiu parabiens de muitas personas y organizacions en esfensa d’a luenga y a cultura aragonesa. Entre as collas, i son belunas que ya feban servir l’aragonés como luenga principal, como Prau, Gaire u Mallacán, pero tamién atras: La Vidriera Irreverente, Kuraia, Inestables, Gran Carvin, La Tarrancha, Estricalla, El Corazón del Sapo, Camille. China chana, pareixe que s’irán adhibindo-ne más.
A inciativa fa un clamamiento a todas as collas mosicals, canten en a luenga que canten, a fer una canta de propio ta cantar-la en aragonés. Ufren, antimás, tot l’asesoriamiento lingüistico que calga t’aduyar a fer u adaptar a letra a ista luenga.
“A nuestra canta en aragonés” tien tamién como obchectivo a “normalización d’a luenga en l’ambito mosical” y s’ubren a toda mena de sonius querendo “desvincular-la de estilos concretos”. En a mesma web, anuncian a posibilidat de que as cantas replegadas se leven a formato CD, “si se dan as condicions”. Por agora se pueden ascuitar en a suya web.
A primer canta feita de propio ta ista iniciativa estió “Sobre una chisla de cierzo”, de La Vidriera Irreverente, que se podió ascuitar por primer vegada en as Chornadas por as luengas d’Aragón de 2013, organizadas por Nogara. A iniciativa ye empentada por l’Asociación Cultural Nogara, Magofermin y o Colectivo de Creadores Irreverentes. O disenyo d’a web y a imachen ye estau feito por Rubén Hervás.
