ARREDOL | Ye a primer dimisión en Aragón relacionada con o caso Bárcenas. José Hueso, conceller d’o PP en Calatayú, ha renunciau iste lunes a las suyas delegacions de Agricultura y Trafico y Policía Local y a la suya acta de conceller.
Encara que no yera afiliau a lo Partiu Popular, salió esleixiu conceller en as zaguers eleccions por ista formación. Fa bells diyas demandó a Mariano Rajoy, president d’o PP y d’o gubierno espanyol que “contase a verdat y actuase ta depurar responsabilidatz politicas y penals si bi’n hese”.
Dende o concello, presidiu por l’alcalde Jose Manuel Aranda, no bi ha habiu garra declaración por agora. Encara que a renuncia t’as delegacions será efectiva de camín, a de conceller no sé podrá fer, por os tramites, dica fin de mes. As siguients personas en a lista electoral, que sustituyirían a José Hueso son Chon Ibáñez y Ignacio Rodríguez, os dos interpresarios d’o lugar.
Ya fa meses heba teniu bella discrepancia con a dirección d’o PP, pasando a un segundo plano y deixando d’estar responsable de Ficienda, como en yera quan prencipió a lechistatura.
Ista dimisión se suma a atras de concellers d’o PP que bi ha habiu dende que se publicó a supuesta contabilidat en B d’o caso Barcenas, pero ye a primera en Aragón. As atras dos estioron as de Eduardo Junquera, conceller de Xixón (Asturias) y David Pasarin-Gegunde de Galdakao (País Vasco).
Noticias relacionadas:
Convocan en Uesca una concentración contra la corrupción y pidiéndo “dimisiones ya”
La obra de teatro de Rajoy se desarrolla entre la indecencia propia y la vergüenza ajena
