ARREDOL | Un cherent d’una cooperativa en Taust ha resultau imputau por a Guardia Civil espanyola por un presunto delito ambiental en detectar-se un vertiu de fuel en a Canal de Taust.
O Seprona d’a Guardia Civil detectó o pasau 23 de chinero un vertiu de fuel que pareixeba proceder d’a citada cooperativa. Iste feito podría afectar entre atras especies a la “Margaritifera Auricularia“, molusco en periglo d’acotolar-se. Os achents observoron como un cambión extrahieba fuel d’una ceica que desemboca en a canal.
Os achents contactoron con o cherent d’a cooperativa d’a on procedeba o vertiu, qui comentó que desconoixeba a cantidat de fuel tirada, considerando que a causa de tal incident podría estar d’una fuga en o deposito d’almagazenamiento. Os bombers d’a Diputación Provincial de Zaragoza metioron una barrera de contención en a ceica ta empachar a espardidura d’o fuel.
O Seprona constató que existiban diferents puntos en a ceica con acumulación de fuel, amás d’a existencia d’una fuga en uno d’os tubos d’o deposito.O vertiu iba dirichiu en dos direccions, ent’a Canal de Taust y enta campos de labor amán d’una explotación ganadera.
A Guardia Civil trobó informes de deficiencias en as instalacions en 2011 que ya fablaba de fugas en o deposito de fuel, asinas como un mal emplego d’o mesmo. Os achents imputoron a o cherent un presunto delito contra os recursos naturals y o medio ambient.
