Paso molto temps fòra de casa, masa diria. Si fa u no fa, dos horas cada dia nomès en despllaçar-me. Me soi feit a sentir la ràdio. Manimenos, dende l'arribada de la pandémia, las informacions me pareixen copiadas d'un dia a un altro. Així que, d'una forma natural, penso, me vai pasar a sentir-i, quan me vaga, escultar- podcasts.
A un d'estes podcasts, en la situacion actual, van decidir de fèr un programa especial pa parllar de la crisis d'Ucrània. El presentador habitual va portar a una persona que va vivir a Rúsia fa uns ans, i els 45 minutos sigüents an estar adedicaus a sacar d'encima toz els prejuícios presents a la nòstra civilizacion, heredèra del triunfo el capitalismo -a la Europa occidental- dimpuesas de la II Guerra Mundial. Dos dias dimpués un altro improvisau experto, pel feit d'haver viviu a Moscú, diva que dudava de la movilizacion i de la intencion de Putin d'atacar Ucrània, perque no s'heva donau la esperada plluya nacionalista dels médios afins a Putin. Tot esto el sentiva a una ràdio espanyòla, dimpués d'haver cambiau perque las ràdios francesas m'atabalavan ya en el tema de la necesidat de mandar soldaus a Ucrània, perque Putin malo, defender democràcia (sic) ucraniana. A este no el van deixar parllar 45 minutos, coma al del podcast, é cllaro.
El mès curioso del caso, u el menos, é que Ucrània no ha denunciau res a l'ONU, igual é per la situacion interna al Donbass actual. Manimenos l 'administracion Biden ya ha presentau la documentacion aon expllica que Rúsia ha moviu soldaus dintro de Rúsia. Igual se lis queda curto el tema de fèr dintrar Ucrània a l'OTAN, i ya demandan que els (posiblles) enemigos, ni armas tiengan. Esto sòna una mica a Gila, pero en misils de verdat, i coma que Ucrània no fa parte d'este selecto club, no ny'hai posibilidat d'esgrimir l'autodefensa mútua automatica.
Estes dias ya se parlla de fèr arribar bells 3.500 soldaus norteamericans pa fèrf rent a la, mès que posiblle, invasión rusa d'Ucrània. Ben, se el cielo s'apllana, a toz mos pillarà debaix! Mes no deixa d'estar curioso que la presunta motivacion rusa expresada als médios occidentals serà la reaccion occidental a una accion rusa de la que, coma fa 40 ans, no tenim informacion cierta. Per molto que mos sorprenda, no me penso que tardem guaire a trobar en falta al guvèrt no-intervencionista de Donald Trump.
La cosa é que el mateix convidau al podcast posava en duda la posiblle invasion, nomès per la inexisténcia d'una campanya interna a Rúsia, aon s'acepta que se s'ha d'atacar é per una agresion externa. Una invasion, per còntra que ben aprisa han debuixau per internet en fllechas de colors, acompanyau de comentarios sobre l'autonomia dels tanques rusos. É curioso que aiquí sí qu'hem teniu un bombardeyo aon se mos parlla de la violenta Rúsia i del antidemocratico Putin. Cosa aceptada de forma social, dende que els malvaus rusos van mirar d'instalar el comunismo al suyo país (i altros) així que, als comentàrios del podcast ny'haveva un puyal de gent que diva que ixe programa eva propaganda sovietica (sic) i exigivan una altra vision pa compllementar la informacion.
Ben regular que un dels autors del programa ya hevar espondiu en un "nomès has d'engegar la tele pa tenir ixa altra vision, la tiens per toz els canals". Esto sí que va resonar coma un misilaço i no els de Putin u Corea del Norte. El que me queda dimpués de veri que ni Ucrània ni Rúsia fan cara de formar part d'esta crisis, é que mos trobam devant d'una altra comédia bufa dels USA, ajudaus una vez mès, per Angllatèrra i las fèstas de Boris Johnson, i que mos foteran ben de mèrda, ixo sí, ben lluen del suyo espácio de seguridat.
Se parlla de sancions al cercllo que està a la vora de Putin. Manimenos, no hem sentiu tan apenas las sancions a las empresas qu'han feit el Nord Stream II, i del que ya en parllarem.
De todas la posiblles sancions, el que é seguro é que els poderosos mos pasaran el braço per la manga, i que coma en situacions anteriors, els nòstros agricultors pagaran els mals d'otri Coma geopolitico d'estar per casa, penso que no é brenca inteligent mandar soldaus pa no precipitar una guerra, de vez que vendes que é l'altro el violento. Guarda que é de dir yo, que me moriré sinse saber-lo deu!
