A ciudat d’Uesca será escenario lo venient 11 d’abril d’una movilización unitaria contra a guerra y o rearmamento. Diversas organizacions socials, sindicals y politicas han convocau una manifestación que prencipiará a las 19:00 horas dende a Plaza Zaragoza, con un mensache claro: no a las guerras imperialistas, no a la OTAN, no a o chenocidio en Palestina y no a l’incremento d’o gasto militar.
A convocatoria s’enmarca en una ola de movilizacions que se son producindo en distintos puntos d’Aragón y de l’Estau espanyol, con protestas en ciudatz como Zaragoza, Madrid, Barcelona, València, Sevilla u Bilbo. En totz estes territorios, plataformas contra a guerra, movimientos socials y colectivos internacionalistas son articulando una respuesta coordinada davant d’o que consideran una escalada belica impulsada per Estaus Unius y Israel.
Seguntes indican as entidatz convocants, estas movilizacions refleixan o creixent rechazo social a uns conflictos que, denuncian, benefician prencipalment a la industria armamentistica y a las grans potencias interesadas en o control d’os recursos enercheticos. En iste sentiu, advierten que a ciudadanía no quiere estar complice d’estas dinamicas belicistas.
A manifestación naixe d’o treballo a ixena en Uesca d’una ret d’organizacions agrupadas en a ‘Plataforma Contra la Guerra’ de Uesca, que ha soscrito un manifiesto unitario. Entre os colectivos impulsors se troban a Universidad Ciudadana, CGT Huesca, CNT Huesca, Huesca con Palestina, Alto Aragón con Palestina, CSA Boira Preta, Ecolochistas en Acción, Asociación 28J, IU-Cambiar Huesca, Bienvenidxs refugiadxs, Caravana Abriendo Fronteras, Estudiants en Defensa d’a Universidat (EDU), FADEA y Árboles Vivos Huesca, entre atros.
Dende ista plataforma remarcan que os conflictos armaus no son realidatz luenhas. Denuncian que a presencia de bases militars estaunidenses en l’Estau espanyol, l’aumento d’o gasto militar exichiu per la OTAN y a complicidat d’o gubierno estatal en politicas d’agresión internacional sitúan al propio Estau espanyol como parte activa d’o entramau belico.
“A clase treballadora y a sociedat civil de Uesca decimos no a las suyas guerras y no a los suyos chenocidios. No pagaremos con os nuestros impostos, ni con as nuestras fillas y fillos, ni con a perda de dreitos socials, una guerra que nomás sirve a los intereses d’as grans potencias y d’o complejo militar-industrial”, señalan dende a Plataforma Contra la Guerra.
As organizacions convocants ponen o foco en a necesidat de reforzar a unidat internacionalista d’a clase treballadora davant d’unas guerras que, aseguran, enfrentan a los pueblos en beneficio d’as elites economicas. Davant d’isto, reivindican a construcción de vinclos de solidaridat internacionalista mas allá de fronteras, relixions u identidatz nacionals.
A movilización quiere estar tamién un chesto d’apoyo a los pueblos que sufren as consecuencias d’estes conflictos. En iste sentiu, a convocatoria se plantea como un acto d’hermandat con o Pueblo palestino, asinas como con atros pueblos como o iraní, cubano u venezolano, a los que consideran victimas d’a agresión imperialista.
“Perque denguna guerra no ye achena a la clase treballadora: an i hai opresión, explotación u chenocidio, allí debe estar a nuestra solidaridat”, concluyen dende a organización.
A manifestación d’o 11 d’abril aspira asinas a convertir as carreras de Uesca en un espacio de denuncia y resistencia devant d’a guerra y as suyas consecuencias, en un contexto internacional marcau per a escalada de tensions imperialistas y l’aumento d’o gasto militar.
