Trobada "Vivir en aragonés": ¿L'aragonés ye vivo?

Una vegada mes ha estau evident que sí. En tot iste cabo de semana ya pasau ha teniu lugar a quatrena Trobada "Vivir en aragonés" en os lugars de Ciresa y Echo a on nos hemos achuntau buena cosa de chent pa pasar o cabo de semana vivindo de raso en aragonés

Imagen del encuentro realizado en 2015. Foto: Cristina Sancho

Ye estada una Trobada seriosa de vez que divertida, con chents d'istos lugars, chunto a chents que son aprendendo aragonés y atras que levan buena cosa d'anyos treballando per l'aragonés, participando en as actividatz y fendo parola, uns en l'aragonés cheso que han tetau dende chicorrons en as suyas casas, atras en l'aragonés que han habiu d'aprender per a suya cuenta, entendendo-se y aprendendo os uns d'os atros. Ha habiu una ripa d'actividatz, teatret, clases d'aragonés cheso, taller de literatura, bailes con os ninos y as ninas, palotiau, monologos, contacuentos, mesas redondas, una vesita turistica, una ferieta d'o libro y prou que tamién muita borina.

A chent de Ciresa y Echo tamién han deixau bien claro que astí se charra aragonés y que ye a suya luenga cutiana. A edat tampoco no importa pa charrar aragonés, no ye cosa d'os lolos de lugars chicorrons, ha habiu chent de todas as edatz, mesmo ninos y ninas que antiparti de chugar, como ha d'estar en a suya edat, los podebas sentir comunicar-se con os suyos pais, as suyas mais y a resta d'a chent en aragonés, tamién entre que chugaban totz chuntos. Ixo encara t'anima mes y te da mes fuerza pa continar luitando per ista luenga que ye nuestra. Ixos ninos y ixas ninas son a esperanza. Cal agradeixer a todas as presonas d'o lugar que s'han vulcau con ista Trobada y a todas as presonas que l'han organizada y que han feito posible que podamos vivir en aragonés, que queramos continar escribindo, charrando, leyendo... luitando a la finitiva per ista luenga menazada y a pocas de despareixer.

¡Aguardamos con ganas a venient Trobada! Asinas que ye evident y se puede decir con argüello que ¡l'aragonés ye bien vivo!

[box]

Foto: Alex Ronco
Foto: Cristina Sancho

[/box]

Autor/Autora

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de nuestra política de cookies, pincha el enlace para más información.

ACEPTAR
Aviso de cookies