Arredol | Os alcaldes d’as comarcas de Campo de Carinyena, Campo de Daroca y a Xiloca se reunioron en Ferreruela d’a Uerva (Xiloca) en esfensa d’o ferrocarril d’a linia Zaragoza-Teruel, vital ta evitar a despoblación d’as suyas comarcas. Demandarán una entrevista con Rafael Fernández de Alarcón, consellero d’Obras Publicas, Urbanismo, Vivienda y Transportes d’o Gubierno d’Aragón con a fin de que aclare quál ye l’esvenidero d’ista linia.
Seguntes istos alcaldes, en istas comarcas existen uns 80 lugars, existe prou trafuca sobre l’esvenidero d’a linia, pues no saben si se sacarán trens u se trancará a linia, encara que creyen que no se trancará. Os alcaldes ninviarán cartas a o consellero ta prebar de que los reciba.
A linia ye poco emplegada debiu a os horarios y a l’autovía Mudéchar. As personas que mas la emplegan son as personas mayors, que gosan de fer-la servir ta ir t’os centros de salut y t’os hespitals. Existe miedo en os lugars d’istas comarcas de que a la fin os suyos habitadors rematen indo-se-ne ent’as ciudatz debiu a la cada vegada pior calidat d’os servicios.
