ARREDOL | 88 nuevos treballadors mas rematarán en as venients semanas en as oficinas de l’INAEM en trancar a interpresa Transportes Generales Alfonso SL, ubicada en Andorra. A interpresa ye en concurso de crededors y seguntes fuents sindicals, os administradors concursals informoron a o comité d’interpresa d’a suya intención de presentar un expedient d’extinción d’emplego que ferá fuera a toda a plantilla y rematará con a liquidación d’a interpresa.
A companyía ya leva bells Expedients de Regulación d’Emplego (ERE) dende bells anyos debiu a la contina perda de clients. A situación ha plegau en una gran deuda en a que os treballadors han deixau de cobrar siet meses de chornal entre nominas normals y pagas extraordinarias. Por isto, quasi toda a plantilla decidió de denunciar a la interpresa ta condiguir que les pagasen os suyos chornals.
En breu, tanto comité como administradors concursals negociarán as condicions d’o venient expedient d’extinción. O comité tien claro que esfenderá o cobro d’as nominas no cobradas asinas como obtener a millor indemnización posible.
Será un duro revés laboral t’a localidat teruelana d’as Cuencas Mineras que atraviesan una situación mas dificil con a progresiva reducción d’as aduyas a o sector d’o carbón.
