Arredol | Iste sabado, 24 d’agosto, se ferá a nuena edición d'ista fiesta, centrada en un d'os alimentos mas conoixius en a Ribagorza oriental. Se celebrará en a localidat ribagorzana de Benavarri a Fiesta d’a Coqueta. Dende as 20:30 h. se prebará de superar un record mundial con a elaboración d’una coqueta blanca de 12 kg. A coqueta ye una croqueta elaborada con derivau de tocín, pero sin anyadius, que como ingredients tien sal, especias, farina, pan y manteca u anís en grano.
A fiesta se treslada a la ubaga d’o castiello, a on se ferán visitas, y i habrá mesas, sillas y mosica jazz pa ambientar a veilada. Se i ferá tallers d’elaboración pa los mas chicotz, s’amostrará cómo se realizan coquetas negras y se tastará.
Os restaurants ferán tapas con productos locals d’a marca “Benabarre Sabor”, con chicolates, tubera, queso, pizca, embutius, etc. que se venderá en as carpas. Amás se realizará o sorteu de productos d’ista marca local.
Ista ye a nuena edición, pero a fiesta tien o suyo orichen en 1298. Mientres a fiesta se reparte unas 3.000 racions de coquetas, mitat blancas, mitat negras.