Quesada (Barcelona, 1963), doctor en Sciencias d'a Información, licenciau en Filolochía Catalana y diplomau en Biblioteconomía y Documentación, descubrió en a suya primera visita a Cuba que en a isla no i heba publicidat comercial y que o suyo puesto l'ocupaban cletas con mensaches politicos, repartidas por tot o país.
L'autor tamién ye profesor titular de l'Aria de Documentación d'a Universidat Autonoma de Barcelona, ha estau comisario d'as exposicions Vaiga cleta: grafica revolucionaria cubana (2009) y O mío tío no se clama Sam: Estaus Unius en a grafica cubana (2016) y autor d'os suyos catalogos. Tamién ha publicau diversos treballos sobre propaganda politica en revistas especializadas.
Quesada, atraito por o conteniu y disenyo d'aquella propaganda, decidió fotografiar-la en os succesivos viaches que realiza a la isla. A medida que estió replegando material estió surtindo la ideya d'elaborar un libro que explicase a historia recient de Cuba d'una forma singular y efimera como son as suyas cletas.
O problema yera que o suyo material ofriba una visión parcial d'a Revolución, ya que reflectaba a conchuntura d'o momento en que estioron fotografiadas. Por isto amenesteba accedir a las imachens de cletas exposadas dende o triunfo d'a Revolución dica que visitó por primera vegada Cuba en 2003. Ta aconseguir ixe material Quesada contactó con a editora politica d'o Partiu Comunista de Cuba, l'organismo encargau d'a propaganda y d'o disenyo y instalación d'as cletas.
A editora disposaba d'un fichero con arredol de 5.000 diapositivas de cletas y cartels. Gracias a un convenio de colaboración, l'autor podió digitalizar o suyo fondo documental ta utilizar-lo con fins divulgativas y d'investigación. O siguient paso estió restaurar as imachens y organizar-las ta estructurar o conteniu d'o libro.
O conteniu d'as cletas tracta temas como o pasau y vinculan o triunfo d'a Revolución con os heroes d'a guerra por a independencia de Cuba en o sieglo XIX. Atras conmemoran os hitos fundacionals d'a Revolución, como l'asalto a o Quartel Moncada u o desembarco d'o Granma. Las bi ha que honran ta os iconos d'a Revolución desapareixius, como Camilo Cienfuegos u o Che Guevara. A mayoría reflecta o present que vive o país y charran de fiques y enemigos, d'exitos y desafíos, de traza que han contribuiu a elaborar l'imachinario d'a Revolución y a comunicar os suyos ideyals.
AraInfo.- ¿Qué han suposau historicament as cletas politicas en Cuba?
Alfons González Quesada.- Todas as grans revolucions, totz os procesos de cambeo radical, han amenestiu destruir os viellos simbolos y imposar atros nuevos ta consolidar y lechitimar o suyo poder. Nuevas banderas, nuevos himnos, nuevas festividatz marcan a ruptura con o pasau y simbolizan a devantadera d'una nueva etapa. O caso cubano no ha estau una excepción y a Revolución ha creyau un imachinario propio a traviés d'a propaganda. Cletas y cartels han estau beluns d'os meyos.
L'imachinario d'a Revolución estableix, entre atras cosetas, una continuidat historica entre os héroes de l'independentismo d'o XIX y os liders d'a Revolución. Fixa os mitos fundacionals t'as celebracions revolucionarias (l'asalto d'o Moncada, o desembarco d'o Granma); transforma en modelos de vida revolucionaria a las suyas heroes y martires, como o Che. A propaganda tamién busca extender y consolidar as valors d'una sociedat en construcción, ganar voluntatz ta aconseguir os suyos obchectivos economicos, productivos, culturals y tamién pretende identificar, denunciar y combatir a os enemigos d'o proceso revolucionario.
AraInfo.- ¿Qué infuencia u cómo las han visto os cubans d'o pasau y d'o present?
Alfons González Quesada.- Desconoixco si existen estudeyos sociolochicos a o respecto, pero creigo que a influencia sobre a población depende d'o grau d'afinidat de cada individuo con o prochecto revolucionario. De todas trazas, ye muit probable que en os primers decenios de Revolución a suya influencia estase muit significativa por diversas razons. A novedat d'o fenomeno comunicativo ye una. Cal pensar que a propaganda politica y social ha dominau o paisache d'a comunicación urbana y ixe dominio bella influencia ha habiu de tener en a asunción d'os mensaches de cletas y cartels. Pero tamién ixe dominio, sin contrapeso por parte d'atros discursos distintos dende o punto de vista ideolochico, puede haber inmunizau a la población, que veye as cletas como parte d'o suyo paisache cutiano, instalaus en a normalidat d'a isla, mas que como mecanismos efectivos que reforcen o proceso revolucionario. Por zaguer, cal tener en cuenta que somos debant d'una forma de comunicación politica que podríanos qualificar d'obsoleta especialment t'as cheneracions mas chovens que, manimenos as dificultatz, son consumidors d'información dichital.
AraInfo.- ¿Sería extrapolable un sistema asinas a un atros países?
Alfons González Quesada.- O monopolio d'o discurso politico y d'a chestión d'o espacio publico t'a suya difusión estioron practicas habituals y compartidas por os países d'o socialismo real. Nusatros vivimos en sociedatz an o monopolio d'o discurso ye mas sutil, pero existe, porque i hai distintos portavoces con un mensache que, con chicotz matices, vienen a dicir o mesmo. En ixe sentiu vivimos dinamicas identicas. O que succede en Cuba ye que o monopolio d'o discurso no s'amaga ni se disbraza como succede en atros entornos.
AraInfo.- ¿Cómo se puede colaborar en o prochecto? ¿Cómo funciona o sistema de financiación?
Alfons González Quesada.- O sistema ta recaudar fondos ta editar o libro ye una campanya popular de microfinanciación, a traviés d'a portalada Verkami. Cada persona puede aportar t'o prochecto y a cambeo se le ofreix una recompensa: ixa persona se convierte en mecenas que contribuye a tirar abance ixa iniciativa. Las recompensas que s'ofreixen son o libro en ebook, o libro en papel a un pre mas avantalloso que como saldrá a o mercau, una serie de copias fotograficas d'as cletas politicas (a trigar), asinas como un taller-conferencia con l'autor. Iste sistema de financiación sirve tamién ta difundir o libro previament y ye una traza d'editar o libro con un mayor respecto a o meyo ambient, ya que s'achusta a tirada a l'intrés suscitau en a plataforma Verkami.
[alaya_toggle status="open" title=""]Puedes leer la entrevista en castellano en este enlace.[/alaya_toggle]
