ARREDOL | O mosico Paco de Lucía s’ha muerto hue a os sixanta y seis anyos a causa d’un ataque de corazón. O guitarrista yera en Cancún (Mexico) con a suya familia. De Lucía ha estau un d’os guitarristas mas virtuosos d’o flamenco, y ha teniu exito en fusionar-lo con estilos diferents, como o clasico y o jazz.
En 1973 publicó o primer disco. Se fació acompanyar en aquells momentos por percusionistas, o que l’aleixaba d’o flamenco mas clasico y daba un aire renovador. En 1976, con o disco ‘Almoraima’, adquirió renombre internacional. I homenachiaba a os clasicos y le fació honra ta estar considerau un d’os millors autors de flamenco y, de feito, un d’os millors guitarristas de totz os tiempos.
Entre os anyos setanta fació una decena de grabacions con o cantante de flamenco Camarón de la Isla. A suya popularidat s’estendilló por tot o mundo con as colaboracions con grans guitarristas, como por eixemplo John McLaughlin, Al Di Meola, Santana y Larry Coryell, con qui experimentó a fusión de flamenco y jazz en discos tant celebres como ‘Passion, Grace and Fire’, a finals d’os setanta.
