A lo largo d'as proximas semanas, lo Ministerio de Transportes va a llevar a cabo los zaguers treballos pa la millora y ampliación d'o puent d'a N-260A sobre lo río Ara.
Las necesidaz, tal como sinyala Carmen Muro, alcaldesa de Broto “han cambiau muito en os zaguers anyos y, con ellas, tamién lo tipo de vehíclos que utilizamos tanto pa los nuestros desplazamientos como pa lo transporte de mercaderías. Podrán pasar de forma simultania y sin estrecheces dos caravanas u, per eixemplo, dos camions, sin que ixo supose un periglo pa los peatones, bella cosa que ocurriba dica agora”.
Las obras, que contan con una inversión proxima a lo millón d'euros, se reprenen “con a seguranza que continarán sin mas parentesi dica la suya finalización”. Carmen Muro recuerda que “la renovación d'esta infrastructura yera muito necesaria, l'equipo municipal treballó muito pa aconseguir-lo dica que s'incluyió en os Presupuestos Chenerals d'o Estau, estiemos muito tiempo reclamando-lo dica que l'aconseguimos y, per fin, luego lo nuevo puent será una realidat”.
L'actual estió construyiu en 1940, “Broto ha cambiau muito dende entonces, ni lo dinamismo economico ni lo movimiento turistico son los mesmos. Yera necesaria una actuación” recalca Muro. Y ye que, esta infrastructura tiene una calzada que supera licherament los seis metros d'amplo y un arcén a cada costau de poco mas de 80 centímetros pa los peatones “clarament insuficient hue en día”.
Las obras “amillorarán no nomás la comunicación entre los dos vicos d'o lugar, deseparaus per lo puent, sino tamién la seguranza d'os viandantes. Amás de dignificar la prencipal vía d'acceso a lo Parque Nacional d'Ordesa y d'as Tres Serols -Parque nacional de Ordesa y Monte Perdido, en castellán-”, ha enfatizado l'alcaldesa Muro.
Malas que concluigan los treballos, l'amplaria total será de doce metros, d'os cuals 2’4 serán de acera a cada costau y la resta, amán de siet metros, la calzada d'o puent.
