ARREDOL | Vladimir Putin, president de Rusia, ha anunciau en rueda de prensa que descarta por agora una intervención militar en tierras ucrainianas pus no considera “que calga”. Manimenos, considera que si a situación vivida en Kiev s’esparde enta l’este d’Ucraína, muga con Rusia, “si a población pide a nuestra aduya, nos reservamos o dreito d’enchegar totz os medios disponibles pa defender-les“.
Ista intervención, si se producise, seguntes Putin, sería “lechitima”, pus o president ruso considera a Viktor Yanukovich o lechitimo president ucrainiano, qui demandó aduya a Rusia. Yanukovich estió destituiu por o parlamento ucrainiano en un acto que ha estau considerau un “golpe d’estau inconstitucional” por Putin, que no reconoixe a las nuevas autoridatz.
O president ruso ha indicau que ista posible intervención sería “l’ultimo recurso pa defender a ciudadanos ucrainianos" que "tienen vinclos historicos y culturals con nusatros”, considerando-lo una “misión humanitaria”. Asinas mesmo Putin ha declarau que no tien intención d’anexar-se Crimea, pus “corresponde a la chent que vive en un territorio decidir sobre o suyo propio futuro“. Crimea, republica autonoma dentro d’Ucraína, tien mayoría de población rusa y perteneixió a Rusia dica 1954.
Tamién Putin ha asegurau que garra militar ruso ha preso garra instalación en Crimea, sino que han estau “grupos d’autodefensa” armaus.
Sobre as sancions con que Estaus Unius y a Unión Europea menazan a Rusia por a suya posible intervenciñon militar, Putin advierte d’as conseqüencias, pus “somos en un mundo interrelacionau, os danyos serán mutuos“.
