ARREDOL | A presidenta d’o gubierno, Luisa Fernanda Rudi ye una d’as candidatas a estar “Enemiga d’o catalán de l’anyo 2014″, un antipremio convocau por a “Plataforma per la Llengua“. A candidatura d’a presidenta Rudi estaría compartida con “o gubierno socialista anterior”.
En a suya candidatura s’esplanica que se nomina a Rudi “por implantar una nueva lei de luengas en contra d’o catalán y d’os criterios academicos y inventar-se una nueva luenga y nombre pa o catalán, o LAPAO”. S’esplanica tamién que compartiría o premio con o gubierno anterior “porque no estió capable de fer un estatuto que reconoixés o catalán como luenga propia y oficial d’Aragón”.
Dentre as candidaturas tamién destacan as de José Ramón Bauzà (president balear), a Constitución espanyola y o Tribunal Constitucional espanyol, o ministro de cultura espanyol José Ignacio Wert, Coca-Cola, o president francés François Hollande u lo president espanyol Mariano Rajoy.
Os candidatos se podrán votar en a web estimoelcatala.cat en una votación ubierta dica o 7 de chinero. O “ganador” d’iste antipremio recibirá una chambreta de Joan Brossa con o lema “Volem viure plenament en català”.
