ARREDOL | Hue remata en Graus o ciclo “Ya puez contá“, que dende 2007, imple o mes con actividatz culturals arredol d’a parola, a oralidat y a literatura. Concursos, charradas, tallers, machia, cine, … toda mena d’actividatz se celebran mientres tot o mes.
Una d'as actividatz ye a convocatoria d’o concurso de microcuentos CIENTOCINcuenta. Ta participar-ie cal fer una historia d’un maximo de ciento cincuanta parolas, en castellano u aragonés ribagorzano y ninviar-lo por correu electronico antes d’o 21 d’aviento. As bases completas d’o concurso de pueden consultar en a web de Espacio Pirineos. Cada anyada cal escribir sobre un tema, estando en ista edición o cine y a cinematografía o tema trigau.
O chueves 4 estió o Seminario ta profesionals “Comunicar millor en cultura: recetas prebadas y nuevas ferramientas“, que ye aintro d’o prochecto cultural PATRIM II, an que treballan entidatz de Occitania, Aragón y Catalunya. En o seminario se charró sobre as ferramientas electronicas, os retes socials y atros temas de comunicación publica endrezau ta os profesionals d’a chestión cultural.
Tamién a tarde d’o chueves, estió la devantadera d’a exposición “Cruce de miradas“ con fotografías de montanya de David Ruiz de Gopegui y textos d’a poetisa Eider Elizegi. A exposición se podrá viyer dica o sabado 3 de chinero en o centro Espacio Abierto.
O viernes prencipió lo cabo de semana con un cuentacuentos de man de Saúl Moreno, autor d’o cuento ilustrau “L’hombre, l’onset“, qui lo recontó chunto a la resta de cuentos pirinencos en que ye treballando. Dimpués i habió reparto de bizcochos con chicolate como ye tradición.
Hue, sabado 6, continarán as actividatz con a zaguer función d’o programa PLATEA en Graus. A versión ta teatro de Pinocho, o clasico de Carlo Collodi, de man d’a companyía Ultramarinos de Lucas. A chornada tendrá tamién a presentación d’o documental Las faldas de la montaña, dirichiu por Belén Ciutad y que presienta testimonios de mullers de Sobrarbe y Ribagorza naixidas d’antes d’a Guerra Civil.
