ARREDOL | 1 d’aviento, Radio Topo 101.8 ferá a suya emisión especial “D’estrela a estrela”. Mientres tot lo diya se ferá una programación de raso en aragonés. Ista ye a segunda edición d’ista iniciativa que naixió l’anyada pasada y que contó con más de 10 horas de programación que se puet ascuitar en o blog de Fendo Orella, programa organizador de l’evento.
En ista edición, a programación se prolargará por más de 15 horas, prencipiando a las ueito d’o maitín con “Sona o revel”, un programa menau por o presentador cutiano de “El Kantamañanas”. Contino i pasarán beluns d’os programas más sinyalers d’ista emisora libre: Fendo Orella, Ciutat Podrida, La Enredadera, El Rocktubernio, Hijos del Agobio, Rueda Libre, El Acratador, el Acorazado Topemkin,…
De traza simbolica, se tornará a fer una emisión de “La cañería” o programa que i feban d’antis mas Ecologistas en Acción y tamién i son convidadas atras radios libres como Radio MAI, Radio La Granja y Radio Chabolo, qui ferán os suyos programas. Como novedat, ista anyada bella parti d’a emisión tamién se ferá en catalán, l’atra luenga d’Aragón. A chornada rematará con una trobada en l’AV Arrebato.
Radio Topo | Horarios y conteníus. En ista segunda edición amaitinamos más y se nos ferá mas tardi. No somos todas as que hébanos quiesto estar-ie en primerías, a la fin nomás que as que hemos puesto… Si fa u no fa 15 horas d’emisión de raso en aragonés en un total de 16 programas, un buen zarpau d’ista emisora que ferán un especial adequando os conteníus suyos a l’aragonés (belún mesmo torna de propio ta ista emisión) y programas tamién d’atras Radios Libres d’a ciudat que han quiesto adhibir-se a ista emisión.
Sona o revel. O programa rei d’os maitins d’a nuestra emisora, El Kantamañanas, ferá sonar o revel en un programa especial con convidaus como por eixemplo a Escuela d’aragonés Nogará. De 8.00 a 9.00 horas.
Esfendemos a tierra. Prochectos de barra a barra d’Aragón que miran d’estricallar-lo. De 9.00 a 10.00 horas.
El Rocktubernio. Especial d’o programa musical de Radio Topo, en aragonés. O millor rock d’a ciudat!. De 10.00 a 11.00 horas.
La Cañería. Torna de propio ta ista emisión o mitico programa de Radio Topo que se feba “con los fondos reservados de Ecologistas en Acción”. De 11.00 a 12.00 horas.
Radio Chabolo. Programa d’as companyeras d’ista Radio Libre que emite dende o CSO Kike Mur. De 12.00 a 13.00 horas.
Mosica disident. Mosica en directo, entrevistas y lo que siga menester. De 13.00 a 14.00 horas.
Kaldo de Cultivo. Especial en aragonés d’o programa que Farmacriticxs fa en Radio Topo. Un analís a la sanidat rural con una fablant patrimonial chesa. De 14.00 a 14.30 horas.
Rueda Libre. Especial en aragonés d’o programa que o colectivo Pedalea fa en Radio Topo. Salut y buen pedal! De 14.30 a 15.00 horas.
Radio La Granja. Programa d’as companyeras d’ista Radio Libre que emite dende o vico de Sant Chusé. De 15.00 a 16.00 horas.
Decreiximiento u barbarie. Teoría y practica sobre o decreiximiento, ¿qué ye isto? ¿ta qué fa honra?. De 16.00 a 17.00 horas.
Fendo Orella. Programa de Radio Topo, como siempre en aragones. Rufierta con convidaus sinyalers d’o mundo de l’aragonés. De 17.00 a 18.00 horas.
Fillos de l’Angunia. Hijos del Agobio de Radio Topo. Ista anyada, programa especial sobre punk aragonés. De 18.00 a 19.00 horas.
El Acorazado Topemkin. Programa de Radio Topo, especial en aragonés. Noticias a canyonazos. De 19.00 a 20.00 horas.
A Liedrera. La Enredadera de Radio Topo, en aragonés y a rebutir de contenius: teyatro, mosica en directo, entrevista a Ánchel Conte, nombres de carreras y asinas-asinas. De 20.00 a 21.00 horas.
Made in Aragon. Programa con dos historiadors que tractarán as esferras culturals en o patrimonio aragonés. De 21.00 a 22.00 horas.
L’Acrataire. El Acratador de Radio Topo en aragones. Programa que dende fa mas de vint anyos fa chent d’o CSA La Revuelta. De 22.00 a 22.30 horas.
Despedida. 22.30… y en rematar feremos una fiesta en l’Avv Arrebato (C/ Palafox), i sotz totz y todas convidadas!.
Ascuíta-nos en o 101.8 d’a freqüencia modulada u a traviés d’internet. ¿Cómo ascuitar Radio Topo 101.8 FM por internet? Ye de buen fer, puncha en o vinclo d’alto que se diz “Streaming” Malas que i punches s’ubrirá un vinclo que has d’ubrir con bell reproductor de soniu que tiengas en l’ordinador tuyo. Atra opción ye que ubras dreitament o vinclo d’o streaming en o tuyo reproductor de soniu.
