Quasi 900 personas han firmau o manifiesto 'Por l’Aragonés'

Se i demanda una "politica adequada, sensata y de consenso."

A  primers d’a semana pasada se publicó un manifiesto “Por l’aragonés” en a web porlaragones.wordpress.com, demandando a la recient creada Dirección Cheneral de Politica Lingüistica que desenrollase una politica basada en o respeto a la luenga viva, a os parladors nativos y a la diversidat de sensibilidatz que se i dan, empentando una politica lingüistica adequada, sensata y de consenso.

O manifiesto naixió dende a sociedat civil (con mas d’una centena de firmants inicials a titol individual), a los quals s’ha sumau muitas mas personas que han manifestau o suyo refirme a traviés d’o formulario que se puede trobar en a web.  Hue, nomás 10 días dimpués d’a suya publicación, quasi 900 personas emparan ista iniciativa, un numbro important si se considera o reduciu d’a comunidat de parladors d’aragonés.  As firmas tamién debuixan, seguntes os promotors, un mapa prou fidel d’a realidat d’a luenga, dende os parladors nativos dica os que l’han adquiriu voluntariament, tanto personas comprometidas en o treballo por a luenga como simples usuarios.   De feito -indican- a conscienciación d’os parladors nativos, que son os que millor pueden guarenciar a suya pervivencia, ye una d’as fayenas mas importants que abordar considerando que a transmisión cheneracional ye a pocas de trencar-se de tot.

Debant d’a imminent elección d’a persona que prendrá a responsabilidat d’a Dirección Cheneral de Politica Lingüistica, os promotors quieren resaltar a relevancia d’o manifiesto como compromís d’acción y consenso por parte de qui asumirá tant dificil fayena.  Tamién animan a la sociedat aragonesa a entender y asumir ixos principios como parte d’un prochecto d’Aragón que dende agora comprenda tamién ista parte d’a nuestra cultura y patrimonio.

Noticia publicada en Arredol.

Autor/Autora

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de nuestra política de cookies, pincha el enlace para más información.

ACEPTAR
Aviso de cookies