ARREDOL | A “Federazión de Fablans” ha feito publico, a traviés d’o suyo blog d’o Ligallo de Zaragoza, un Mapa de l’amostranza de l’aragonés a on que replegan os datos de todas las personas que son fendo cursos d’aragonés d’una u atra traza. O mapa ye estau elaborau por Fernando Castañer, qui lo publicó iste martes en o suyo perfil de Facebook y dende alavez ye estau compartiu por os retes socials.
Os datos que se i replegan dan un total de quasi 800 alumnos que son estaus aprendendo aragonés en iste curso. D’ells 387 son ninos y ninas que lo son aprendendo en as escuelas de lugars de l’Alto Aragón como A Espuña, Benás, Bielsa, Biescas, Candarenas, Castilló de Sos, Chaca, Chistén, L’Aínsa, Las Pauls, Pandicosa, Plan, Sallent, Samianigo, Sant Chuan de Plan, Sarabillo, Sarllé, Saúnc, Senegüé y Tramacastiella.
Atras 412 personas lo son aprendendo en os cursos ufiertos por asociacions culturals, socials u sindicals, u mesmo por personas a ran particlar. Zaragoza ye a ciudat a on que más chent ye aprendendo aragonés, con quasi 200 alumnos y con cinco entidatz fendo-ie cursos (AC 20 d’abiento, AC Nogara, AC O trango, Fablans Zaragoza y Universidat). As Cinco Villas ye a siguient redolada a on que más alumnalla bi ha, plegando en 68 alumnos, distribuyius en cursos en Exeya, Uncastiello, Pinsoro, Luesia y Sos. Contino son Barcelona y a Chacetania que tienen más d’una vintena d’alumnos en os cursos que fan en Chaca, Canfranc, Ansó y o Centro Aragonés de Barcelona. Monzón, Balbastro, Uesca, Samianigo y L’Aínsa irían un poco más dezaga pasando a decena d’alumnos cadaguna. A resta de localidatz a on que se son fendo cursos se completa con Biscarrués, Buera, Andorra, Ixar y Plan.
Ta fer o mapa, s’ha contactau dreitament con os responsables d’as asociacions qui han alportau os datos que se i cuaternan. O numer de cursos y alumnos podría estar mesmo más gran, en no haber-ie datos oficials y en no contar-se-ie a chent que lo aprende de traza autodidacta.
