ARREDOL | L’edificio d’a historica fundición Averly, en Zaragoza, continará a salvo a lo menos por bell tiempo más. Iste chueves s’aturaba la licencia ta esboldregar o 60 % d’a fabrica que heba dau o Concello de Zaragoza. A presión legal d’Apudepa (Acción Publica t’a esfensa d’o patrimonio aragonés), y a movilización vecinal han conseguiu que, por agora, s’aturen as obras.
A fiscalía de l’estau respondeba a la demanda de Apudepa y a Plataforma Salvemos Averly demandando información a lo concello de Zaragoza. T’as asociacions en esfensa d’Averly o expedient de esboldregue d’a fabrica “tien posibles irregularidatz” como que “se creben os parametros urbanisticos en o Plan Especial, se concede una licencia en suelo urbano no consolidau y se zarra de traza irregular o expedient municipal de protección de Averly como Bien d’Intrés Cultural y Conchunto d’Intrés”. Dimpués de conoixer-se l’escrito d’a Fiscalía de l’estau, todas as collas politicas con representación en o concello, alcordoron suspender de traza temporal l’esboldregue d’a fabrica. Con tot y con ixo, Carlos Anadón, Tenient Alcalde d’Urbanismo, consideró que as dubdas churidicas planteyadas por Apudepa y Salvemos Averly tienen “poco fundamento”.
L’esboldregue ya s’heba aturau lo pasau febrero dimpués d’un auto d’o Tribunal Superior de Chusticia d’Aragón (TSChA). En no poder Apudepa continar con o proceso chudicial por no presentar a fianza millonaria que caleba, o TSChA permitió que continase a licencia d’esboldregue entabant. Ista vegada l’ature tamién ye temporal, dica que se solucionen, d’una traza u atra, os entrepuces mesos por o recurso presentau, u que se plegue en una solución politica.
En os zaguers diyas, a movilización ciudadana t’aturar as obras ha creixiu y ha amostrau o refús de buena parte d’os ciudadans l’esboldregue. O maitin d’o miercols bellas decenas de personas se chuntaban baixo a plevia en a Plaza d’o Pilar ta demandar l’ature d’as obras a o concello y decidiban en asambleya de continar con as movilizacions. A tarde d’o chueves os manifestants se arrocloron debant de l’edificio de Averly celebrando l’ature, pero quedando en estar-se-ie a daria ta cusirar que no tornen a encetar-se as obras. Totz os diyas a las 19:00 se i ferán reunions ta continar con a movilización y privar de que i dentren as maquinas.
En opinión d’Apudepa, o conflicto “no puede tener que una solución politica". Asperan ubrir una “nueva etapa de dialogo” ta plegar en una “solución que pase por a conservación de tot lo patrimonio cultural y que se prenga un modelo respetuoso con os intreses chenerals d’a ciudat.
