ARREDOL | As actuacions policial y chudicials contra as faltadas en os retes socials que prencipioron dimpués de l’asesinato de Isabel Carrasco, presidenta d’a Diputación de Leyón, a mans d’atra afiliada d’o PP, han plegau ista semana en Andorra, en o Baixo Aragón. A policía chudicial d’a Guardia Civil ye investigando os comentarios que se facioron en a colla privada de Facebook “Andorra@s, tengo una pega“. Por agora, s’ha citau chudicialment a un ciudadan por comentar que a presidenta Luisa Fernanda Rudi “podría corret a mesma suerte que Isabel Carrasco. Bells atros vecins de Arinyo y Andorra tamién han habiu de declarar.
A presidenta visitó a localidat baixoaragonesa en un acto electoral o pasau 15 de mayo. O diya d’antes, una ciudadana comentó en a colla de Facebook que Rudi les teneba “ixublidaus” y que creyeba que bi iba “ta redir-se-ne de nusatros”. O ciudadan, seguntes informa o periodico La Comarca comentó: “Ke corra la misma suerte ke la leonesa. Hija de la grandísima puta. Me he kedao mas hancho ke largo. Pongo lo ke siento”. A Guardia Civil lo prenió iste chueves en o suyo puesto de treballo ta interrogar-lo y l’anunció que recibiría una citación chudicial ta compareixer en o Chuzgau por “penchar en Internet frases insultants relacionadas con politicos”.
L’acto electoral d’o PP en Andorra contó con a presencia de bells ciudadans que i expresoron o suyo refús t’as politicas que son desembolicando. En tot inte estioron cusiraus por a Guardia Civil. Os citaus a declarar coinciden en sinyalar a o PP d’o lugar como os denunciants, cosa que ha desmentiu Manuel Alquézar, o suyo president, qui vincló a protesta con “una prebatina de boicot de bellas collas de extrema cucha”.
Bells andorranos ya han convocau ta ista tarde a las 20:00 en a Plaza d’o regallo un acto en “esfensa d’a libertat en os retes socials”.