Con l’actuación de The Bronson, qui dimpués ganarían o premio a la mayor prochección, prencipió iste mierques a XVI Gala d’entrega d’os Premios d’a Mosica Aragonesa, que tornó a celebrar-se en o Teatro Principal de Zaragoza. Os premios estioron muito repartius, trunfando Las Novias y Calavera con dos premios cadagún, en una gala que estió rebutient de reivindicacions.
Una d’ellas, a d’a luenga aragonesa ya prencipió en a entrega d’o premio a la mayor prochección. Anchel Cortés, un d’os “entregadors” esfendió, charrando en aragonés, a normalización d’ista luenga. Tamién os components de Gaire, ganadors d’o premio a la millor canta en 'luenga autoctona aragonesa' por “Dondiador”, facioron o suyo discurso en aragonés.
Pero a gran reivindicación d’a nueit se centró en a mosica, como no podeba estar d’atra traza. A baixada de l’IVA t’a cultura estió present en muitos d’os discursos. Tamién o papel d’as salas, en o premio a la millor programación que ganó a sala “El 21″ de Uesca, u la vieda t’os menors d’edat en os conciertos que refusoron Las Novias, qui recordoron que os suyos propios fillos no pueden ir t’os suyos conciertos.
Cuanto a las actuacions, a gala tornó a contar con momentos que pasarán t’a memoria. Love of lesbian, dimpués de replegar o premio Global d’a mosica aragonesa, tocoron “Segundo asalto” sin garra micro ni amplificación. Nomás a voz de Santi, os coros y a guitarra facioron callar a un teatro emocionau. De tot diferent, estió l’actuación de Manolo Kabezabolo qui replegó o premio Especial a la trachectoria por os suyo trenta anyos fendo punk. O suyo discurso estió tant breu como contundent, fendo alcordanza d’os “presos y torturaus en as garchola” y rancando un fuerte aplauso d’o publico, antes de despedir a gala con un par d’os suyos temas.
Mientres a gala, presentada por Mariano Bazco y Carlos Higueras, de Starkytch Pinchadiscos, se podioron viyer as actuacions de Los Gandules, Artistas del gremio, In Materia y Domador. Tamién se vivioron muitos momentos de remeranza enta personas d’o mundo d’a mosica que nos deixoron estianyo como Ruben Martínez, de la Vidriera Irreverente, Alberto Genzor, Coco Fernánez, y Urko Paradys. Maria José Hernández, d’atra man adedicó o suyo premio a lo millor Album por “Las Uvas Dulces”, a o disapareixiu Jose Antonio Labordeta.
Os XVI premios d’a mosica aragonesa, que organiza totz os anyos o colectivo Aragón musical, continan asinas consolidando-se como un d’os eventos más importants y visters d’a cultura aragonesa y, prou que sí, d’a mosica.
Totz os premiaus estioron:
Premio Especial a una Trachectoria: Manolo Kabezabolo
Premio Especial a la Achitación Cultural: La Lata de Bombillas
Premio Global d’a Mosica Aragonesa: Love of Lesbian
Mayor Prochección: The Bronson
Millor Colla: Las Novias
Millor Solista: Pecker
Millor Álbum: “Las uvas dulces” de María José Hernández
Millor Álbum Autoeditau: “No te reconozco” de Domador
Millor EP: “Quebranta” de Calavera
Millor Producción: “Navegando al cuadrado” de In Materia por Raúl Quílez
Millor Canta: “Baby lemonade” de Bigott
Millor Canta en Luenga Autoctona Aragonesa: “Dondiador” de Gaire
Millor Directo: Las Novias
Atras Mosicas: Orquesta Popular de la Magdalena
Millor DJ: Chelis
Millor Programación Musical: El 21
Millor Video: “Trovadores” por Iván Castell
Millor Portalada: “Quebranta” de Calavera por Álvaro Ortiz y Erica Fustero