Ahiere Prau replegoron o premio a la millor canta en Luenga Autoctona Aragonesa en os XIV Premios d'a mosica aragonesa que se celebró en o Teatro Prencipal de Zaragoza.
Os premios empentaus por o colectivo Aragón Mosical dioron a la banda a reconoixencia que se mereixen dimpués de mas de 15 anyos de trayectoria con l'aragonés como luenga prencipal. O tema eslexiu estió o que da nombre a o suyo zaguer treballo "Os pietz en a tierra" y no faltoron as parolas reivindicativas d'os componentes d'a banda (Chabi, Fer y Dani) que puyoron a o escenario a replegar o galardón, dedicando o premio a la chent que ha colaborado en iste treballo y a os colectivos que dan vida a la cultura en aragonés como A Enrestida, Radio Topo, o suyo sello Magofermin u l'Avv Arrebato, tamién nominada como millor programación 2012.
