PP y PAR preban de zarrar as Cortes quan se i debatan “afers conflictivos”

ARREDOL | Os dos partius que refirman o Gubierno d’Aragón, PP y PAR, quieren viedar a presencia de publico en os Plenos d’as Cortes d’Aragón a on que se vaiga a charrar de “afers conflictivos”. Asinas lo facioron saber iste martes en rechistrar una esmienda t’o nuevo reglamento d’as Cortes a on que demandan que se prenga ixa mida. A mesa d’a cambra, presidida en ista lechislatura por Jose Ángel Biel (PAR), podrá viedar a lo publico l’acceso t’a tribuna quan “preveiga de traza suficient que en una determinada sesión d’o pleno puedan producir-se beluna d’as alteracions reguladas en o …

Representants d’as mareas ciudadanas en As Cortes o pasau aviento. Foto: El Ventano
Representants d’as mareas ciudadanas en As Cortes o pasau aviento. Foto: El Ventano

ARREDOL | Os dos partius que refirman o Gubierno d’Aragón, PP y PAR, quieren viedar a presencia de publico en os Plenos d’as Cortes d’Aragón a on que se vaiga a charrar de “afers conflictivos”. Asinas lo facioron saber iste martes en rechistrar una esmienda t’o nuevo reglamento d’as Cortes a on que demandan que se prenga ixa mida. A mesa d’a cambra, presidida en ista lechislatura por Jose Ángel Biel (PAR), podrá viedar a lo publico l’acceso t’a tribuna quan “preveiga de traza suficient que en una determinada sesión d’o pleno puedan producir-se beluna d’as alteracions reguladas en o reglamento”.

As razons que se dan ta ista esmienda son privar de que tornen a viyer-se imachens como as que bi habió en bells plenos, quan bells ciudadans carranyaus interrumpioron con chilos u amostrando cartels bellas intervencions. En os zaguers tiempos os bombers, os miners u as mareas han protagonizau beluns d’istos episodios.

Dende a oposición, a critica no s’ha feito asperar. Dende IU han amostrau un refús total a la esmienda y creyen que o PP y o PAR quiere “meter entrepuces a la participación ciudadana”. “No imos a permitir que l’autorización ta dentrar en a tribuna penda d’o que considere en cada inte a Mesa d’as Cortes”, dició Adolfo Barrena, portavoz d’a colla parlamentaria de IU en as Cortes.

Barrena se pregunta a on quedan “ixas afirmacions” de José Ángel Biel a on que declaraba que “as Cortes serían puertas pataleras t’a participación ciudadana” y crei que a cambra “no puet estar una bombolla que no conoixca a realidat social y ciudadana y lo que cal fer ye facilitar a presencia d’a chent, que siga más fluyida y con menors restriccions”.

CHA, en a mesma linia, ha calificau a esmienda de “censura y faltada” y ha acusau a o PP y o PAR de “querer convertir as Cortes en un bunker”. “Ye simplament censura propia d’as dictaduras”, ha afirmau o diputau Jose Luis Soro. Tamién ha criticau o hipotetico mecanismo ta videdar a dentrada “Agora be-te-me que por estar en a Mesa d’as Cortes se van a tener tamién poders ta endevinar si bi habrá incidents antis que no pasen” y, somarda, se pregunta si os portavoces de PP y PAR se creyen “que son en a cinta Minority Report”, a on que os crimens se castigaban antis que no se fesen.

O nuevo reglamento d’as Cortes que se ye debatindo en ista lechislatura, recibió iste martes más de 200 esmiendas. D’ellas 44 son estadas presentadas de conchunta por PP y PAR, 71 por o PSOE, a formación politica que más i ha presentau, 70 por CHA y 24 por IU.

Autor/Autora

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de nuestra política de cookies, pincha el enlace para más información.

ACEPTAR
Aviso de cookies