ARREDOL | Un lote de diez pergaminos d’os sieglos XIII a o XV, un misal d’o sieglo XVI y un inventario de 1929 tornan a la suya localidat d’orichen: Cantaviella. O director de Patrimonio Cultural d’o Gubierno d’Aragón, Javier Callizo, fació entrega ahiere a l’alcalde d’o municipio teruelano, Ricardo Altabás, d’ista important documentación historica.
Se tracta de documentos d’entidat churidica que estioron recuperaus dimpués d’una investigación realizada de forma coordinada entre a dirección cheneral de Patrimonio Cultural, a Guardia Civil, o Concello de Cantaviella y a Comarca d’o Mayestrato. Concretament, o lote que yera incluiu en o catalogo d’una casa de subhastas, estió interveniu en octubre de 2011. Posteriorment, a Unidat Operativa de Policía Chudicial d’a Comandancia de Teruel d’a Guardia Civil lo depositó en o Fichero Provincial de Teruel pa lo suyo estudeo y dichitalización.
Entre iste tiempo os tecnicos de patrimonio han realizau un estudeo y una catalogación. D’ista forma se confirma que a totalidat d’os documentos perteneixen a o Concello de Cantaviella. Asinas mesmo se constata que a documentación, que ya forma parte d’o patrimonio documental aragonés, ye orichinal y data entre os sieglos XIII a o XX, correspondendo os pergaminos a os sieglos XIII y XIV, o misal a o sieglo XVI y l’inventario a 1929.
Descripción d’o lote:
Pergamino 1: Privilechio d’o Rei Chaime II, por o qual se fa francos a os habitants de Cantaviella d’o dreito d’as cenas reyals, exceptuando solament si o Rei viene personalment a Cantaviella. (Calendata: 28 de marzo de 1298).
Pergamino 2: Privilechio d’o Rei Chuan por o qual concede a las tres bailías de Cantaviella, Castellot y Aliaga pa que no puedan meter marcas de totz os suyos reinos. (Calendata: 16 de chunio de 1388).
Pergamino 3: Treslado d’un privilechio concediu por o Rei Chaime II a favor d’as tres bailías confirmando as franquezas, peaches y atras libertatz por tot o reino de Valencia. (Calendata: 17 de febrero de 1293).
Pergamino 4: Privilechio d’o Rei Chuan por o qual se fa exentas a las Bailías de Cantaviella, Castellot y Aliaga d’o pago de dreitos de coronación y maridache d’as fillas d’o Rei, a que yeran obligadas as bailías. (Calendata: 15 d’octubre de 1394).
Pergamino 5: Copia y treslado d’o privilechio atorgau por o Rei Chaime II a las bailías, confirmando-les dreitos y libertatz por medio d’o Mayestre d’o Temple. (Calendata: 12 de chulio de 1292).
Pergamino 6: Compromís y sentencia arbitraria entre a comunidat de Teruel entre pastos y lenyas dentro y difuera d’as comunidatz. (Calendata: 2 de chunio de 1309).
Pergamino 7: Privilechio d’a Reina Isabel, esposa d’o Rei Chaime, endrezau a o gran Mayestre d’a orden d’o temple, por o qual concede a Cantaviella franquezas y libertatz seguntes os fueros de Zaragoza. (Calendata: 15 de setiembre de 1294).
Pergamino 8: Privilechio d’o Rei Martín, por o qual confirma y ratifica os privilechios, libertatz y franquezas concedius por os suyos antecesors a la bailía de Cantaviella. (Calendata: 20 de noviembre de 1399).
Pergamino 9: Treslado d’o privilechio d’o Rei Chaime por o qual se concede as libertatz y fueros d’Aragón a Cantaviella por l’auxilio d’os hombres, caballos, vituallas y diners ampraus pa la conquiesta d’a población. (Calendata: 7 de chunio de 1233).
Pergamino 10: Treslado d’o privilechio d’o Rei Pero por o qual se concede franquezas a las tres bailías de Cantaviella, Castellote y Aliaga. (Calendata: 28 d’agosto de 1208).
Misal: Se tracta d’un misal d’a ermita de Sant Blas d’o sieglo XVI que estió tresladau a o fichero de Cantaviella por o prior Joaquín Plana en 1773. Ye compuesto por 66 fuellas mas un indiz, enquadernau en piel y fusta con broche metalico. O pergamino ye o suporte utilizau.
