ARREDOL | O Partiu Republicano ha ganau as eleccions de mitat de mandato en os EE.UU. con a recuperación d’o control d’o Senau, que heba perdiu en 2006. Como mantienen a mayoría en a Camara de Representants, os republicanos han aconseguiu asinas o control total d’o Congreso norteamericano y son en posición de dictar l’achenda parlamentaria d’os dos zaguers anyos d’o segundo mandato d’o democrata Barack Obama en a Casa Blanca.
Por o chefe d’a mayoría republicana, Mitch McConnell, ‘ista experiencia de masiau estau ya ha durau prou’: ‘Ye a hora de cambiar de dirección y encarrilar o país en a buena vía‘, anunció dimpués de saber que heba estau reelechiu. ‘Y a buena vía ye, basicament, adoptar rapidament midas en favor d’o creiximiento economico d’o país‘.
Redotas democratas
Amás de perder o control d’o Congreso, o Partiu Democrata ha experimentau una redota psicolochica con a perda de qualques estaus importants. Ye o caso d’Illinois, do Obama empecipió a carrera politica. En Florida y Michigan, os gubernadors republicanos Rick Scott y Scott Walker han obteniu victorias inasperadas con una marguin de voto mas gran que no se preveyeba.
A las eleccions renovaban as 435 cadieras d’a Camara de Representants y un tercio d’o Senau.
