ARREDOL | Dende o 18 a o 20 de chulio, a localidat cincovillesa d’Uncastiello será a protagonista d’as suyas Chornadas de Cine Mudo, que estianyo celebran a suya catorcena edición. En esta edición d’as chornadas, organizadas por La Lonjeta, asociación cultural local, os protagonistas serán os cuentos, a traviés de curtometraches y largometraches.
Como peliculas destacadas, “Blancanieves“, de Pablo Berger, ganadora de 10 premios Goya; “Peter Pan“, de Herbert Brenon; “Ella Cinders“, d’Alfred E. Green; “Cinderella“, de Lotte Reiniger u “Sanz y el secreto del aire“, documental sobre a vida de Francisco Sanz, mosico y ventrilocuo valenciano, entre atras peliculas que se prochectará mientres os tres días. As procheccions s’acompanyarán con mosica en directo.
Entre as diferents actividatz d’as chornadas, se i ferá homenache a Charlot, o personache de l’actor Charles Chaplin que estianyo fa un sieglo d’a suya primer aparición en o cine. Tamién se podrá recorrer a exposición “Cuentos en la Linterna Mágica“, de Stella Ibáñez y Francisco Boisset, Oswaldo Felipe realizará o cuentacuentos “Debajo de un telón“, y o grupo local Abbeynida Road actuará.
Tamién colaborará o festival francés chirmano d’Anères, que ha feito una triga de curtometraches adedicaus a diferents personaches de cuento.
A “Bocina de piedra“, galardón d’as chornadas, tendrá como destinatarios a o director de cine Pablo Berger, o responsable d’Aula de Cine y de Cine y Dreitos Humanos Luis Antonio Alarcón, y o mosico y compositor Ignacio Alfayé.
Pa saber-ne mas: www.cinemudo.org