ARREDOL | O yuan s’ha convertiu en a segunda moneda mas usada en o comercio mundial por debant de l’euro, seguntes os datos actualizaus dica o pasau mes d’octubre por a organización de servicios en as transaccions financeras SWIFT. A moneda china aconsiguió en octubre una conduta de mercau d’o 8,66%, muito por alto de l’1,89% rechistrau en chinero de 2012, frent a o 6,64% de l’euro, que ha visto como o suyo uso ha caito dende chinero de l’anyo pasau, quan representaba o 7,87% d’o total.
Os cinco países con mayor uso d’o yuan entre o pasau mes d’octubre estioron China, Hong Kong, Singapur, Alemanya y Australia, precisó a organización: “O yuan ye clarament una moneda ‘top’ en os intercambios financiers globals y encara mas en Asia”, destacó Franck de Praetere, responsable de pagos y mercaus comercials ta l’Asia Pacifico de SWIFT.
Manimenos, l’uso d’o yuan encara ye luen de menazar o dominio d’o dolar, a conduta de mercau d’o qual se situó en octubre en o 81,08%, seguntes os datos aportaus por o SWIFT. Antiparte, por o que fa a o volumen de pagos en yuans, a moneda china se mantenió estable en octubre en dotzena posición, con una lichera caita de l’actividat a o 0,84% d’o total, frent a o 0,86% de setiembre.
Manimenos, entre o mesmo periodo os pagos en yuans aumentoron a suya valor un 1,5%, mientres que o creiximiento t’o conchunto de monedas estió d’o 4,6%.
