ARREDOL | O Pleno d’o Tribunal Supremo ha decidiu d’admitir a tramite a demanda de paternidat presentada por Ingrid Jeanne Sartiau contra Juan Carlos I. De vez, os machistraus d’a Sala de lo Civil de l’Alto Tribunal en han refusau unatra presentada en o mesmo sentiu contra o rei por Alberto Solá.
Seguntes fuents churidicas, os machistraus admiten a tramite a demanda de Sartiau y refusan la de Solà d’alcuerdo con l’articlo 767.1 d’a Lei d’Enchuiciamiento Civil. “En garra caso s’admitirá la demanda sobre determinación u impugnación d’a filiación si con ella no se presenta un prencipio de preba d’os feitos en que se funde”, sinyalan. Isto significa que, independientement d’o que vaiga barruntando a instrucción, bi ha indicios en a demanda d’a muller ta, a lo menos, investigar.
Totz dos demandants han recurriu a los tribunals encara que o rei no puede estar chuzgau. Manimenos, ells creyen que a demanda suya se refiere a conductas privadas de l’anterior chefe de l’Estau y que ixo queda dillá d’o que marca a lei. A decisión d’os machistraus d’admitir a tramite a demanda de Sartiau se produce en contra d’o criterio d’a Fiscalía, que emparó refusar as dos demandas.
O Parlamento espanyol aprebó a Lei Organica 4/2014 o pasau chuliol ta estendillar l’aforamiento que tien l’actual chefe de l’Estau a su pai, a reina Sofía, a reina Letizia y a princesa d’Asturias. D’istas trazas, as demandas que se trobaban en l’Audiencia ed Madrit, estioron trasladadas t’o Supremo.
En una entrevista a eldiario.es, Solà declaró o pasau chunio que as suyas pretensions no yeran economicas y que sacaría la suya demanda con una simpla gritada de Juan Carlos I. Solà tien 56 anyadas, ye decir, ye mayor que Felipe VI, por lo que un teorico fallo favorable a los suyos intreses lo reconoixería como lo lechitimo rei d’Espanya. A Lei Salica deixa difuera d’ixa posibilidat a Sartiau