ARREDOL | A Lei Antidesafiuzamientos que aprebó en solitario o PP fa 14 meses va en contra d’os dreitos fundamentals d’os ciudadanos. Asinas l’estableixe una sentencia d’o Tribunal de Chusticia d’a Unión Europea (TJUE) en considerar que a lechislación espanyola viola l’articlo 47 d’a Carta de Dreitos Fundamentals d’a Unión Europea, que consagra o dreito a la tutela chudicial efectiva de totz os ciudadanos.
O fallo d’o TJUE, con calendata de 17 de chulio, considera que a lei espanyola (1/2013) coloca en una situación d’inferioridat a o deudor respective a o banco. En o caso que un chudgau d’o mercantil dé a razón a l’hipotecau frent a la entidat porque considera que s’ha aplicau una clausula abusiva y suspenda a execución d’una hipoteca, o banco puede recurrir en apelación. Pero si o chuez sentencia a favor d’o banco, o deudor no puede recurrir en segunda instancia ta solicitar ixa suspensión d’a execución hipotecaria. Solament si a la fin o chudgau d’o mercantil da a razón a l’hipotecau, iste recibirá una indemnización, pero ya habrá perdiu a casa suya.
A Lei 1/2013 de midas ta reforzar a protección a os deudors hipotecarios, reestructuración de deuda y loguer social modificó a Lei d’Enchuiciamiento Civil de l’anyo 2000 en materia d’execución hipotecaria. Agora, o Tribunal de Chusticia d’a UE considera que a lechislación espanyola contradiz a Directiva 93/13/CEE d’o Consello de 5 d’abril de 1993. Ista, en l’apartau 1 de l’articlo 7, estableixe que “os estaus miembros veilarán ta que, en intrés d’os consumidors y d’os competidors profesionals, existan medios adequaus y eficaces ta que cese l’uso de clausulas abusivas en contractos celebraus entre profesionals y consumidors”.
Por extensión, o TJUE estableixe que a Lei Antidesafiuzamientos espanyola viola igualment l’articlo 47 d’a Carta de Dreitos Fundamentals que estableixe que “toda persona con dreitos y libertatz guarenciaus por o Dreito d’a Unión violaus, tiene dreito a la tutela chudicial efectiva, respectando as condicions establidas en o present articlo”. O Gubierno se veyerá obligau, por tanto, a reformar a Lei d’Enchuiciamiento Civil, por estar a lei de procedimiento en que introdució modificacions a Lei 1/2013.
O TJUE falló en marzo de 2013 que a lechislación espanyola yera “abusiva”, en respuesta a una qüestión d’un chudgau de Barcelona por o caso d’un obrero marroquí que heba estau expulsado de casa suya en Martorell. L’Executivo realizó un mes dimpués una reforma que no estió emparada por garra grupo d’a oposición y suscitó un fuerte refuse en a PAH. A Plataforma heba promoviu una Iniciativa Lechislativa Popular con un millón y medio de sinyaturas, que incluiba a dación en pago, y que os redactors d’a lei ignororon.
Proximos fallos
O Tribunal de Chusticia d’a Unión Europea ha interveniu ista vegada a solicitut de l’Audiencia de Castellón, que planteyó una qüestión prechudicial por o pleito d’una parella con o BBVA. Os chueces de Castellón quereban conoixer o posicionamiento d’o TJUE antes de fallar y planteyoron un procedimiento accelerau. Seguntes fuents churidicas, o TJUE tien a lo menos atras 16 qüestions prechudicials d’atros tribunals espanyols encara por resolver.
A Plataforma d’Afectaus por a Hipoteca (PAH) celebra o fallo d’o TJUE porque considera que “reconoixe a vivienda como bien de consumo de necesidat basica, de traza que nos mete un poquet mas cerca en a reconoixencia d’a vivienda como dreito fundamental”, en parolas d’un d’os suyos advogaus, Rafa Mayoral.
A PAH presentó un recurso d’inconstitucionalidat contra a Lei Antidesafiuzamientos y Mayoral considera que o fallo d’o TJUE coincide con beluns d’os argumentos presentaus en dito recurso, o que podría afectar a la decisión d’o Tribunal Constitucional.
