ARREDOL | En una decisión historica, o gubierno britanico anunció que o pueblo cornuallés será reconoixiu oficialment como minoría nacional d’o Reino Uniu, igual como en son os pueblos galés, escocés y irlandés. A decisión ye fundamental t’os defensors d’a identidat propia de Cornualla, porque dende agora a os cornualleses se les reconoixe oficialment o estatus de grupo nacional diferenciau d’os angleses. Un feito important porque, precisament, os cornualleses son o unico grupo de cultura celtica que no disposa d’a suya propia asambleya autonoma en o Reino Uniu.
A reconoixencia se ferá dentro d’a Convención Marco t’a Protección d’as Minorías Nacionals d’o Consello d’Europa. Os estaus que la sinyan se comprometen a “promover as condicions necesarias” porque “as personas perteneixients a minorías nacionals” puedan “mantener y desenrollar a suya cultura y preservar os elementos esencials d’a suya identidat, ye dicir a suya relichión, luenga, tradicions y patrimonio cultural”.
O prencipal partiu d’o nacionalismo cornuallés, Mebyon Kernow (MK), ha qualificau a decisión de “noticia fantastica”. O suyo lider, Dick Colo, ha recordau que i hai habiu chent fendo campanya ta obtener ista reconoixencia entre os zaguers quince anyos.
Paralelament, MK ye realizando una campanya ta l’autonomía de Cornualla dentro d’o Reino Uniu. O partiu replega sinyaturas dende fa meses t’a creyación d’una Asambleya Cornuallesa que tienga competencias lechislativas en quantas materias internas, incluindo educación, sanidat, vivienda, cultura, luenga, agricultura y pesca.
En o censo de 2011, o 14% d’os habitants de Cornualla declaroron que a suya identidat nacional yera a cornuallesa. O 70% dicioron que a suya nación yera l’anglesa y o 24%, que nacionalment se consideraban britanicos. Yera permitiu de declarar mas d’una identidat nacional, por o qual a suma da mas de 100.
