O PP apreba a LOMCE en o Congreso sin garra consenso

Arredol | Os populares han quitau ta debant a LOMCE con os votos d'a suya mayoría parlamentaria, a oposición de totz os demás grupos fueras de Foro Asturias y UPN, que s'han absteniu.  O PP ha aprebau con a suya mayoría y en a mas absoluta soledat a Lei de Millora d’a Calidat Educativa. a polemica Lei Wert, que ha recibiu l’apelliu d’o suyo empentador, o ministro d’Educación, José Ignacio Wert, ha completau o tramite parlamentario dimpués d’una scenificación de refuse total d’os grupos d’a oposición y una larguisma votación (se consideraban as mas de 700 esmiendas presentadas) en que …

Wert Felipe Borbon UniversidatArredol | Os populares han quitau ta debant a LOMCE con os votos d'a suya mayoría parlamentaria, a oposición de totz os demás grupos fueras de Foro Asturias y UPN, que s'han absteniu.  O PP ha aprebau con a suya mayoría y en a mas absoluta soledat a Lei de Millora d’a Calidat Educativa. a polemica Lei Wert, que ha recibiu l’apelliu d’o suyo empentador, o ministro d’Educación, José Ignacio Wert, ha completau o tramite parlamentario dimpués d’una scenificación de refuse total d’os grupos d’a oposición y una larguisma votación (se consideraban as mas de 700 esmiendas presentadas) en que obtenió 182 votos populars a favor, 137 negativos d’a resta d’os grupos y dos abstencions (de Foro Asturias y UPN).

En o debat, totz os grupos, fueras d’UpyD, han prencipiau os suyos discursos manifestando a intención de derogar a lei quan cambie a mayoría parlamentaria. “Será una lei que naixerá muerta, que irá como un zombi dica que o PP pierda a mayoría”, ha dito Enrique Álvarez Sostres, de Foro Asturias, encara que o partiu s’ha absteniu en a votación.

Ideolochica, nacionalista, fanatica, hipocrita, nacionalcatolicista, centralista, uniformizadora, nostalchica, espanyolizadora. A lei Wert, y con ella tamién o suyo maximo responsable, o ministro, han recibiu ista mena de calificativos entre as exposicions d’os diputaus. Uxue Barcos, de Geroa Bai, ha charrau en nombre d’o Grupo Mixto pa queixar-se que o Gubierno no ha quiesto escuitar as opinions discordants y Mario Bedera, d’o PSOE, ha asegurau que a lei “creya problemas do no bi’n heba” y s’ha preguntau “cómo se puede estar tant insensible a la clamor cheneral”. “Faiga-se una favor y no pase a la historia por estar o ministro que aprebó a lei mas efimera”, retó a Wert o diputau de Compromís-Equo, Joan Baldoví. Pa acabar con un “Venceretz pero no convenceretz”.

A defensa d’o castellano

Joan Tardá, d’ERC, ha levau dillá o desafío. Ha asegurau que a lei no s’aplicará en Catalunya. “Franco prebó de matar a nuestra luenga y no l’aconsiguió. Y vusté tampoco“, afirmó. Y ha soltau un “No pasarán” que tamién ha incluiu en o suyo discurso o diputau d’Amaiur Xabier Errekondo. “Quí ye o gubierno de Madrit pa imposar ista lei a os nuestros fillos y fillas?”, se preguntó y instó a o Gubierno a “respectar o que a sociedat vasca decida”. Y ha calificau a la lei de “ferramienta estratechica pa recentralizar y espanyolizar”.

CiU ha considerau dreitament que a LOMCE ye “un ataque a o modelo d’immersión lingüistica de Catalunya”. Y ha recordau os esquimens d’ixe sistema: “Os míos pais no podioron estudiar o catalán. Os míos amigos y yo solament una hora a la semana. Os míos amigos no lo dominan por escrito si no l’han emplegau profesionalment. Os míos alumnos dominan totz dos, y os míos fillos dominarán totz dos y muit bien l’anglés“, ha exposau Martí Barberá, de CiU.

Dimpués d’as criticas d’os nacionalistas, que han acusau a o Gubierno de meter en periglo luengas como o catalán u l’euskera, o diputau d’UPyD Carlos Martínez Gorriarán ha defendiu a esmienda alcordada con o PP (una d’as pocas que s’apreboron que no estió empentada dreitament por os populars) que mete de relieve o papel d’o castellano “como luenga vehicular d’a educación en tot o territorio d’o Estau“. Gorriarán sostiene que iste texto lo unico que fa ye tornar a o que diz a Constitución y no “relegar o espanyol como ocurre actualment en Catalunya y o País Vasco”, ha asegurau.

L’obchectivo, seguntes ha explicau en tot momento o ministerio d’Educación, ye guaranciar o dreito d’as familias que quieren escolarizar a os suyos fillos en castellano en Catalunya. Pa ixo ha disposau que sía o Gubierno central qui en primeras abone o coste de ninviar a ixes ninos a una escuela privada y dimpués iste desconte l’importe a la Generalitat d’a suya asignación.

Retalles y privatización

Os retalles tamién han ocupau buena parte d’as criticas d’a oposición. A diputada d’Izquierda Plural, Caridad García Álvarez, que puyó a la tribuna lucindo a camiseta verda de defensa d’a educación publica, ha acusau a o Gubierno de mermar o presupuesto educativo en 5.000 millons d’euros y ha recordau que l’Executivo “ha adquiriu compromisos debant d’a UE de seguir retallando dica 2015″. Con a reducción de plantillas docents, de becas y aduyas a o estudeo y a desaparición de programas de refirme a l’alumnau con dificultatz, García Álvarez, inquirió a o ministro: “Calidat pa quí? Pa qui pueda pagar-la?”. En iste sentiu, Tardá acusó a o ministro de buscar a “estabulación d’os alumnos con menos recursos economicos”, y Mario Bedera (PSOE) ha sosteniu que a LOMCE no va contra o fracaso escolar, sino contra os alumnos que fracasan porque no tienen medios suficients. “Os nuestros alumnos han de saber que no ye lo mesmo estudiar que no”, ha defendiu a diputada d’o PP, Sandra Moneo.

O caracter privatizador d’a LOMCE, una d’as prencipals criticas que se le fa dende a comunidat educativa, ha estau destacau en qualques intervencions. O texto aprebau da rango de lei a mecanismos que ya se realizaban en comunidatz como Madrit y por as que l’Administración cedeba sulero publico pa la construcción de centros d’educación privada. Amás, os expertos advierten que o feito que o preambulo charre d’a educación como “servicio” simplament y no ya como “servicio publico” ubre a puerta a mas intervención d’o capital privau en o sistema educativo. “Con a suya lei será o centro o que esleiga a os alumnos y lo ferá seguntes le salga mas barato”, ha asegurau o diputau socialista. “Cómo puede decir dengún que bi ha contenius poco utils? Poco utils pa lo mercau, claro”, ha ironizau García Álvarez.

“A LOMCE segrega y mercantiliza a educación”, ha continau a representant d’Izquierda Plural. Y Joan Tardà (ERC) ha avalau ista afirmación y ha charrau de “a hipocresía de pretender combatir o fracaso y l’abandono escolar quan en realidat s’imposa a privatización d’a educación”. Debant d’as acusacions de midas “segregadoras”, o ministro Wert ha contraatacau: “No existe segregación mas grieu y razón d’exclusión mas contundent que l’abandono escolar temprano”. Espanya conta con una d’as taxas d’abandono temprano mas altas d’a UE, encara que as estadisticas charran d’una leve millora en os zaguers anyos.

A relichión

“O que les incomoda ye que as familias puedan eslechir a educación y no l’adoctrinamiento que buscoron vustés con a suya asignatura estrela, Educación pa la ciudadanalla”, ha sosteniu Moneo. L’asignatura ya no figura en o curriculo escolar, y ha estau reemplazada por una optativa clamada Educación en Valors. O Consello d’Estau ya heba consellau a o Gubierno reconsiderar ixa decisión por a importancia d’os contenius de l’asignatura, pero Educación ha zarrau o tema asegurando que ixes contenius se tractarán “de forma transversal” en todas as clases.

O que sí estableixe a LOMCE ye una puyada de categoría de l’asignatura de Relichión, que pasa a estar evaluable -una d’as historicas reivindicacions d’a Ilesia- con o que a suya nota cuenta pa lo promedio academico y, por tanto, pa la obtención de becas y aduyas. Foro Asturias ha resumiu as suyas criticas en una frase: “En ista nueva lei s’han imposau os lobbies relichiosos“, ha asegurau Álvarez Sostres. “A nuestra Constitución reconoixe un estau aconfesional. O que quiera relichión que la tienga, pero difuera d’as aulas“, ha clamau García Álvarez (Izquierda Plural).

Formación Profesional

Izquierda Plural ha recordau as declaracions d’un d’os ponents d’o PP en a comisión como resumen d’o esprito d’a lei: “Os estudiants malucios pa FP y os buenotz pa Bachillerato“. Y ha acusau a os populars d’enganyar con o discurso de dignificar a FP. “Vustés no quieren ixo. Si no, ya serían estendillando a ufierta de plazas pa los mils de chovens que se’n son quedando difuera”. Seguntes os calculos de sindicatos y asociacions de pais, entre 18.000 y 22.000 estudiants s’han quedau sin puesto en as aulas de FP nomás en Madrit, tot y que o numero d’alumnos s’ha ixamplau a 35 por aula y docent.

O ministro Wert ha defendiu a necesidat d’a lei apelando a os resultaus d’o zaguer informe PIAAC que analisa as competencias en comprensión lectora y matematicas d’a población de 16 a 65 anyos. O ministro ha destacau a posición rezagada d’os espanyols respective a os países d’a OCDE. En as replicas, os diputaus d’a oposición han recordau que muitos especialistas destacan a evolución que ha protagonizau Espanya en iste aspecto.

“Estoi que tien un problema de comprensión lectora”, ha ironizau Mario Bedera (PSOE). “O que diz ixe informe ye que a población entre 55 y 65 ye a que obtiene piors resultaus” -37 puntos por baixo d’os chovens- “o que significa ye que as personas mayors tenioron una pior educación”. Y ha citau a Andreas Schleicher, director d’o programa PISA, a qui Wert ya heba apelau pa defender a exclusión economica que suposan uns malos resultaus academicos en o competitivo mundo laboral. Mario Bedera (PSOE) mencionó una entrevista a Schleicher de 2007 en que aseguraba que os cambeos lechislativos en Educación d’ixe momento (l’actual LOE) iban en o camín d’os países con millors resultaus en l’informe PISA (que mide as conoixencias d’os ninos de dica 16 anyos).

Wert querió estar categorico, encara que finalment deixó dubdas sobre l’exito d’a LOMCE pa amillorar o papel espanyol en os tant mencionaus PISA y PIAAC: “No soi d’os que creyen que una lei educativa resuelva totz os problemas educativos. A mía confitanza en a lei ye limitada”, ha asegurau Wert. Y ha feito un poder por “pasar la pelota” a o terreno d’a oposición: “a lei marca una serie de normas de chuego que son importants y que le proporcionan normas a os chugadors, pero si os chugadors no chugan, no bi ha partiu”.

Autor/Autora

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de nuestra política de cookies, pincha el enlace para más información.

ACEPTAR
Aviso de cookies