A pasada semana o Director Cheneral de Politica Lingüistica d’o Gubierno d’Aragón, Ignacio López Susín, presentó un informe en o Parlamento europeu, en Estrasburgo referent a la situación d’as lenguas propias aragonesas, aragonés y catalán.
Dito informe se presentó en o Intergrupo d’o Parlamento Europeu sobre Minorías Tradicionals, Comunidatz Nacionals y Lenguas. López Susín destacó que “as dos lenguas (aragonés y catalán) se troban en una situación muito delicada“. Tamién comentó que dende as institucions no i ha habiu dica agora accions pa conservar y protecher ditas lenguas.
O Director Cheneral fue explicando as diferents midas presas dende o Gubierno aragonés destacando “os esfuerzos en a ensinyanza, habida cuenta d’a importancia que tiene en o mantenimiento de cadaguna d’as lenguas“. Cal recordar que s’ha iniciau un programa piloto en que l’aragonés ye lengua vehicular en a etapa d’educación infantil por agora en Pandicosa, Echo y Benás, asinas como l’asignatura “Lenguas Propias d’Aragón” en primaria, ESO y Bachillerato.
López Susín declaró que o Parlamento europeu se compromete a “colaborar pa millorar a situación en os venients anyos“.
[alaya_toggle status="open" title=""]Noticia de Arredol.[/alaya_toggle]
