O club de montanya “Los trepadores del Calatorum” organiza o Calatorum Festival que se ferá en o lugar de Calatorau o 8 de setiembre. Entre as actividatz programadas a más destacada ye o II Campionato d’escalada de nueitz Calatorum, que l’anyada pasada i participó a-saber-la chent. Encara que no ye aintro d’o circuito oficial de competición, i participan esportistas de gran ran. Ye un d’os pocos campionatos que se fan de nueitz, fendo mesmo más spectacular a practica d’a escalada.
A intención d’a organización ye d’amanar iste esporte ta toda la chent y, más que más, t’a catrinalla, ta que sigan en contacto con a naturaleza y l’esporte. “Ye una disciplina apta ta totz os publicos, rai a suya forma fisica, que quieran superar-se a si mesmos”, dicen.
O festival prencipia a las 10 d’o maitin con un parque multiaventura, a on que os más chiquetz puedan prener contacto con iste esporte. Contino se ferá un concurso de ranchos ta chentar. De tardis bi habrá una exhibición de bulder con a participación d’o publico. Antis d’o campionato d’escalada actuará a colla ‘Samba da praça’ y en rematar o campionato continarán as actuacions mosicals.
Fuent: Arredol
