ARREDOL | O XII Festival Internacional de Poesía d’o Moncayo se celebrará iste sabado, aintro d’a programación cultural “Veruela Verano”. En ista edición se homenacheará a lo poeta d’a Cheneración d’o 27 Luis Cernuda.
O viernes dende as 19.00 horas se contará con a mosica de “Borina moncaina” y se ferán lecturas y procheccions de videopoesía. A las 21 prencipiará l’actuación de Jordi Skywalker y se ferán performances y bookcrossing.
As actividatz d’o sabado, prencipiarán con una lectura en o Museu d’o Vin a las 11.00 horas d’o maitín a on que participarán, entre atros, o poeta Angel Guinda. L’acto rematará con una actuación mosical de Luigi Maráez. De tardis, dende as 19.00 horas se presentarán as Cartas de Luis Cernuda a Bernabé Fernández-Canivell en a ilesia d’o Monasterio. Dimpués, El Silbo Vulnerado ferán una actuación especial y bi habrá un espectaclo de danza.
D’atra man, o domingo 28 de chuliol, remata o ciclo “Cantos Sonaus” con un recital d’a Capilla Gregoranista Easo, a las 12.00 horas en a Ilesia d’o Monasterio. Ista Capilla ye una sección d’os diferents coros que fan o “Coro Easo” de Donostia, creyada en 1995 y que ha actuau quantas vegadas en semanas especializadas en mosica sacra.
