Dimpués d’anyos treballando en colectivos feministas, participando activament en movilizacions y en diferents aspectos d’o feminismo, de momento, entras en a decada d’os 30 y a realidat te fote un lapo.
Tot principia con a gran pregunta que malas que fas os 30 se posa dencima d’a tuya cabeza como una boira fosca que marca tronada. Quiers tener fillos? Quan? Quiers estar mai?
Primero de tot que encara no ye superau que sigas muller y talment no quieras estar mai, o mesmo que no quieras decidir encara si quiers estar-lo u no. Pero, amás, en a nuestra cheneración en a que hemos mal viviu a base de buena cosa de treballos precarios ixa no ye a pregunta correcta. A pregunta en o caso que quieras estar mai sería: te puetz permitir estar mai? En muitos casos malas que pasas os 30 dimpués de muitos obstaclos, puede estar que haigas aconseguiu estabilizar a tuya vida profesional y mesmo escomencipar a tener bell logro por o que tanto has luitau. No te puetz permitir estar mai si no quiers que se veiga afectada a tuya carrera profesional. Primera cosa que creyebas que a lo millor yera superada y paras cuenta que en a cheneración d’os autonomos (que agora se claman emprendedors) no ye cierto. Manimenos, encara que en os zaguers anyos se sigan equiparando as leis de baixas por maternidat u paternidat por desgracia a crianza d’os fillos sigue estando relacionada con as mais.
Miras arredol de tú y totas as cosas que te pensabas que yeran superadas y que yeran propias d’atras cheneracions veyes que se tornan a reproducir en a tuya. Veyes por as tuyas amistatz u chent conoixida que en muitas ocasions son as mais as que siguen tenendo o peso d’o cuidau d’os fillos, las que los recullen si tienen bella malotía deixando o suyo treballo, les dan a minchar (encara que ya no les de tetar) y asinas-asinas.
Dimpués quan sales de borina en o famoso “tardeo” por a ón se deixa veyer o plumo buena cosa de chent que ye arredol d’os 30. Veyes como b’ha mesaches casaus (que nian se molestan en amagar l’aniello) y con fillos fotendo pedretas y mirando de ligar con mesachas tanimientres as suyas mullers son en casa a o cargo d’os fillos. Tot a o más puro estilo d’una película d’Alfredo Landa pero en o sieglo XXI. Si, si, pareix una ixas películas que fan dimpués de minchar en “cine de barrio” d’as que tanto t’hebas esmelicau porque yeran casposas de tot. Y de rapiconté veyes que tot s’esboldrega y que si no paras cuenta podría estar a vida que t’espera.
Deixando as bromas a un costau he arribau a bella conclusión, encara no he decidiu si quiero estar mai y me niego a haber de decidir-lo por haber superau una edat. Pero lo que tamién tiengo claro ye que en o feminismo encara nos queda fer tranya en o camín d’os cudiaus. D’o suyo reparto equitativo, de meter dencima d’a mesa que son o centro d’a vida ya siga por a crianza d’un fillo, como fer-se cargo d’una persona dependient u d’as personas grans. Fan part d’a economía porque as personas cudiadoras deixan os suyos treballos, ocio u mesmo de percibir ingresos pa fer-se cargo d’atrás personas. Por ixo hemos de fomentar o dialogo social y personal de cómo chestionar esta mena de situacions pa que totas as personas se faigan cargo d’os cudiaus; y no nomás en o legal como suposadament ye contemplau sino en o personal que ye a ón ye agora mesmo a mayor desigualdat porque ye más fácil d’amagar.
Por ixo a luita feminista a día de hue encara fa tanta falta.
