#vadacheneral14N  Economía

O bicipiquete colapsa Zaragoza

ARREDOL | A las 7.30 en a Pza. d’o Pilar yera a cita t’o ya tradicional bicipiquete. A policía espanyola ha identificau a bellas personas que acudiban t’a convocatoria y poco dimpués d’a hora de quedada ha saliu a colla ciclista ent’a Glorieta d’a Puerta d’o Sol ta tornar a chirar por Echegaray y Caballero...
| 14 noviembre, 2012 16.11

Llegada del bicipikete en plaza del Pilar de Zaragoza. Foto: AraInfo

ARREDOL | A las 7.30 en a Pza. d’o Pilar yera a cita t’o ya tradicional bicipiquete. A policía espanyola ha identificau a bellas personas que acudiban t’a convocatoria y poco dimpués d’a hora de quedada ha saliu a colla ciclista ent’a Glorieta d’a Puerta d’o Sol ta tornar a chirar por Echegaray y Caballero enta Pza. Europa. Unas 300 personas han empecipiau a marcha, pero han iu unindo-se-ie china-chana mientres o recorriu plegando dica arredol de 1.000 ciclistas.

En a Pza. Europa s’han viviu os primers intes de tensión debiu a que o bicipiquete ha dau vueltas de contino, colapsando dita plaza a tamás d’as prebatinas de regular o trafico d’a policía local. A policía espanyola, que contaba con un parell de furgons d’as Unidatz de Prevención y Reacción (UPR) y bells motoristas ha prebau de sacar a bells ciclistas a la fuerza, cosa que a la fin no han puesto consiguir. En ixe inte, o bicipiquete s’ha trestallau en dos, una parti ta l’Actur y l’atra ent’o Pº María Agustín.

Os dos bicipiquetes han continuau os suyos respectives camins clamando a la vada cheneral y recriminando a la chent que iba a treballar u t’os colechios y institutos. S’han continuau dando vueltas en as rotondas mientres os conductors y conductoras perdeban a paciencia y no deixaban de sentir-se os chiflos d’os autos mezclallaus con os chilos clamando a la vada. En a Pza. Mozart, una d’as collas s’ha tornau a trestallar en dos, y una ha iu enta Avenida Catalunya y l’atra por Camín d’as Torres. De nuevas o caos circulatorio reinaba. En Camín d’as Torres con Av. Cesáreo Alierta y mas ta debant en o cruce con Tenor Fleta, o bicipiquete s’ha aturau, fendo perder os niervols a bells conductors que no se creyeban o que yera pasando.

As tres collas a la fin s’han tornau a chuntar en una en o cruce entre Gran Vía y Avenida Goya, en a estación de tren d’o mesmo nombre, a on s’han tornau a aturar provocando o caos. A policía espanyola y a policía local yeran de raso desbordadas por a situación en tot momento. En ixos intes yeran en o bicipiquete unas 1.000 personas, que han continuau camín d’o campus de Sant Francho d’a Universidat de Zaragoza.

Salindo enta l’Av. Sant Chuan Bosco s’han produciu intes de tensión con bells motoristas que prebaban de pasar a tamás d’o bloqueu de bicis que s’han trobau debant. A la fin, bells minutos dimpués, ha apareixiu a policía espanyola, quan ha pasau ya tot o bicipiquete, sin producir-se garra incident.

En Vía Universitas con Violant d’Hongría y Gómez Laguna, o bicipiquete ha tornau a deseparar-se en dos. Una colla enta Vía Hispanidat y l’atra enta l’Av. Madrit.

De nuevas, bells enfrontinamientos verbals entre conductors y ciclistas en a rotonda entre Vía Hispanidat con Gómez Laguna por o granizo entrasque que se yera producindo. Un helicoptero de Trafico ha feito acto d’aparición mientres as ciclistas daban vueltas sin aturar en Os Enlaces, momento en que de nuevas as dos collas trestalladas s’han tornau a chuntar, sin que ya se tornen a deseparar.

Dende astí han apareixiu por Av. Nabarra, y han continuau enta Pza. Ciudadanalla, tornando a dar vueltas y  salido enta Pº María Agustín, a on han pasau por a Chefatura Superior de Policía, a on CGT yera concentrada demandando a liberación d’as dos personas d’iste sindicato detenidas de nueitz. O bicipiquete ha dau a vuelta y s’ha solidarizau tamién, ta continar enta Pza. Europa. Antis de plegar a o cruce entre iste paseu y l’Av. Madrit, una marcha d’institutos ha apareixiu, tallando o bicipiquete o trafico ta que ista marcha podese prener a calzada. Aplausos y chilos por a vada y por a educación publica s’han puesto sentir.

Finalment, o bicipiquete ha tornau a prener a Pza. Europa ta continar enta Pza. d’o Pilar a on ha rematau o bicipiquete con un socalce, chusto quan o piquete antibancos prencipiaba a marcha. Garra incident destacable, fueras d’enfrontinamientos verbals.

En Uesca, unas 70 personas han participau en o bicipiquete de maitins, a las 10 h., recorrendo o centro d’a ciudat, sin que en tengamos guaire mas información. Bellas personas han estau identificadas y tres han estau retenidas ta estar identificadas en comisaría. Denuncian maltracto y abuso policial. A las 16:30 parte atro bicipiquete en a ciudat uescana.

14 noviembre, 2012

Autor/Autora

"Arredol quiere fer una apuesta por potenciar a comunicacion en aragones. Queremos fer un medio de referencia, pero en aragones, que planteye atro paradigma socio-politico y cultural". (arredol.com / @arredol)


Twitter
Facebook

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de nuestra política de cookies, pinche el enlace para mayor información.

CERRAR