ARREDOL | Fendo-se estianyo 100 anyadas dende que naixese a escritora semontanesa Chuana Coscujuela y 10 dende a suya muerte, o Consello d’a Fabla Aragonesa ha quiesto adedicar o 14eno numer d’a suya revista Luengas y Fablas ta l’autora de “A lueca – Istoria d’una mozeta d’o semontano”.
En as quasi 300 pachinas d’a revista se incluyen bells treballos lexicograficos. Dos d’ells son centraus en as poblacions de Monzón y Uesca, feitos por Félix Torres y Arturo Lacasa, y un tercer, feito por Rafel Vidaller, amuestra os resultaus d’enqüestas lexicograficas sobre o medio natural entre 2008 y 2010. A primer parti d’a revista tien, antimás, un estudio de fonetica historica aragonesa sobre un documento d’o sieglo XI, un estudio lingüistico d’un pregón de Naval d’iste sieglo y la presentación de ueito cartas cruzadas entre Veremundo Méndez y o filolofo Badía i Margarit, replegaus por Óscar Latas.
A revista se completa con un treballo de Francho Nagore arredol d’un vocabulario de Azuara de metat d’o sieglo XX, una reflexión de Chesús de Mostolay sobre determinaus fonemas en l’aragonés, la traducción a l’aragonés d’a Lei de no luengas, cinco resolucions d’o Consello Asesor de l’Aragonés (organo interno d’o CFA) y un informe sobre l’antroponimia d’a Cinca Meya.
Finalment, tamién bi ha un espacio t’a creyación literaria con dos relatos ineditos de Santiago Román y Pedro Lafuente.
