ARREDOL | Dende o venient lunes, l’Instituto d’Estudios Altoaragoneses ufrirá a la población uescana quatro nueitz adedicadas a o misterioso, mitos, bruixas y sectas antigas, aintro d’una nueva edición d’as suyas “Nueitz Machicas“. A cita será dende o lunes 8 dica o chueves 11 de chulio en a siede d’ista institución en a C/ Parque 10 en Uesca. As sesions serán todas a las 22:30 h. y a entrada ye libre. As charradas serán a l’aire libre.
A programación prencipiará o lunes 8 con a charrada “O chamanismo europeu en as nuestras radices culturals”, con Josep M.ª Fericgla, Doctor en Antropolochía Cultural y Social. O martes 9 ye o turno de “Recetas machicas, remedios medicinals y divertidas formulas de cosmetica y cocina, recopiladas en o sieglo XVII”, con Mª Antonia Buisán, Educadora de Museus. O mierques 10 se charrará sobre “Bruixas: historias y historietas”, con a escritora Mª Ángeles Irisarri de ponent. Y pa rematar istas nueitz, o chueves 11 o tema será “Sectas y sectarios en l’Aragón d’o sieglo XIX: descontentos y librepensadors en una epoca que miraba nuevos cauces”, que contará con a presencia de Pepe Rodríguez, Doctor en Psicolochía y Profesor d’a Facultat de Comunicación d’a Universidat Autonoma de Barcelona.
Dende l’Instituto d’Estudios Altoaragoneses informan que “os temas d’estianyo constituirán una motivación pa amanar-nos, a traviés d’as suyas manifestacions en a historia y a cultura d’Aragón, a o mundo d’as creyencias, mitos, tecnicas rituales y fantasías.
