ARREDOL | Un analís d'o Washington Post revela que nueu de cada diez comunicacions interceptadas por l’achencia yeran d’usuarios comuns. De 2009 a o 2012, quan l’Achencia de Seguranza d’os EE.UU. (NSA) interceptó cuentas d’internet d’extranchers a qui podeba cosirar legalment, tamién replegó as conversacions de mils y mils d’usuarios normals d’internet, tanto d’os EE.UU. como de difuera. Lo revela un analís d’o Washington Post. De feito, o diario calcula que de cada diez comunicacions interceptadas nueu yeran d’internautas comuns, y no pas de personas baixo o foco d’os servicios d’intelichencia.
Tot y que istas comunicacions conteneban información personal y sin utilidat t’os analistas d’o NSA, l’achencia retenió a mayoría. Entre os 160.000 mensaches y quasi 8.000 documentos d’11.000 cuentas d’internet filtradas fa un anyo por Edward Snowden y analisadas por o diario, i hai muitas ‘historias d’amor y desamor, costumbres sexuals ilegals, crisis mentals, conversas politicas y relichiosas, angunias economicas y asperanzas trencadas. A vida cutiana de mas de diez mil usuarios que no yeran en a lista d’obchectivos de vichilancia d’os EE.UU.’. Tamién i hai mas de 5.000 fotografías privadas.
O diario adhibe que iste espionache en masa, en bell caso, dio pistas de valor t’a intelichencia, como por eixemplo a revelación d’un posible programa nucleyar secreto en o extranchero. Seguntes a lei, a vichilancia d’a NSA solament ha de tener por obchectivo ciudadanos extranchers que se troben difuera d’os EE.UU., de no estar que i haiga una orden chudicial especial.
