Un mensache viral, d’ixos tan de moda en zaguerías, atravesó ahier os retz socials privaus (os grupos de Whatsapp) y publicos (cuentas de Twitter u Facebbok, pachinas web, etc.): “Nicolás se ha colado en tu grupo”. A o costau, una foteta d’o crianzón de moda en l’Estau espanyol, un segallo con cerras a lo josemari y cara de pijaito.
Os media no fan so que descubrir cada día nuevas aventuras d’o tal Nicolás: fotos con celebrities d’o mundo conservador espanyol de toda mena, pasatas d’o mesache que en un petén, d’un 007 hispanico teenager pasó a estar un presunto estafador que ha deixau en ridiculo a quantos servicios de protocolo y seguridat de todas as institucions que se puedan imachinar. A instantanea d’o zagal acachau debant d’o zaguer borbón en pillar a corona espanyola puede resumir perfectament a epoca que nos ha tocau de vivir.
Perque a puyada y baixada suya ye una buena metafora d’a Espanya de hue. Fa bells anyos se denominó a “cultura del pelotazo” a ixa anglucia que, como una pasa, s’espardiba entre aquells que quereban ganar diners a tot trance. Ta conseguir-lo rai si caleba blincar per dencima d’a lei, mirar-se t’altro costau u pillar buens muesos. Ya en as anyadas 90 as corruptelas empliban informativos y papels. Asinas veyemos puyar y cayer a quantos politicos y banquers, como ye o caso de Mario Conde, l’amo d’a gomina.
Agora se repite a historia punto per agulla, ixamplando a suya onda expansiva, que mesmo ha arribau enta institucions que antes parixeban intocables de tot. Hue as noticias de corrupción sobreixen a campirol en l’actualidad. Hue ya nian se charra de “cultura d’o pelotazo”, perque pareix interiorizada de tot.
En un ambient asinas, a historia de Nicolás bien pareix un nuevo capítol d’a literatura de picaresca, un personache surtiu precisament en o sieglo d’Oro d’as letras en espanyol peninsular.
Pero, que quiers que te diga, amable lectora u lector… A yo o cuento d’iste mocet m’ha feito acordar-me d’altros episodios d’a historia recient d’iste trocet de mundo an que vivimos: Aragón. Perque en Aragón tamién hemos teniu bell Nicolás que nos ha quiesto encular.
Tos feretz memoria totz y todas d’aquell prochecto que iba a estar más important que no pas os Reis Catolicos (!) t’Aragón y cómo remató a ideya de fer d’Ontinyena y totz os Monegros un Las Vegas europeo. Mesmo as Cortes d’Aragón cambioron bella lei ta fer-se a las desichencias d’os supuestos inversors, que ya contaban con bell ilustre antecedent en países como Bolivia u Serbia.
Per meter-ne altro eixemplo, en as anyadas 90 o gobierno, alavez de Santiago Lanzuela (PP), se lanzó voluntariosament a refirmar o prochecto d’un premio nobel de Fisica, Carlo Rubbia, que yera criticau ubiertament per chent de tot o planeta. No i faltoron as aragonesas y aragoneses, quan queremos tenemos ixe punto tant desconfiau que nos fa terriblement chenials, que facioron a siguient reflexión: “Si ye una cosa tant buena, ¿Per qué la trayen a Aragón?”. Pues sí, dimpués de protestas ecolochistas y de esconfianza cheneralizada, o prochecto de Rubbia, o Rubbiatrón, que iba a cambear as fuents d’enerchía ta cutio, s’esbafó ta no tornar a amanixer en garra cabo. Como si no hese existiu, como si lo hésenos sonyau. Bien se vale que existen as hemerotecas y podemos recordar qui deciba qué en cada momento.
Perque yo, si m’he de quedar con bell uno d’istos impostors, pues que queretz que tos diga! Me fa más gracia o pijaito Nicolás. Perque total… me pienso que ye muito millor de fer-se selfies y posar en ridiculo a os politicos que no pretender enganyar a tot un pueblo con supuestas inversions y megaprochectos que a la fin no rematan estando so que estrucias ta foter bell pizco en a caixa de totz y todas.
Rubén Ramos | En Arredol
