ARREDOL | Commoción en o mundo d'o montanyismo aragonés por a muerte en os Mallos de Riglos d'o veterano escalador mientres puyaba por a chaminera Pany-Haus d'o Mallo Pisón.
O montanyero zaragozano Jesús Ibarzo, de 67 anyos, moriba iste martes quan prebaba de puyar a chaminera Pany-Haus en o Mallo Pisón d’os Mallos de Riglos, dimpués de cayer dende 20 metros d’altaria.
L’accident ocurrió de mediodiyas y deixó a l’escalador agazapiau entre dos paretz. Encara que yera vivo y mesmo conscient quan os servicios de rescate lo quitoron d’astí en un dificil rescate, morió en l’hespital San Chorche de Uesca do estió tresladau con politraumatismo, traumatismo cranial, trencadura d’anca y pneumotorax.
En o momento de l’accident yera acompanyau por Ursicino Abajo “Ursi”, atro veterano y conoixiu escalador y habitual companyero y cunyau suyo. A vía que escalaban yera facil y no yera nueva pa ells. Amás Ibarzo se trobaba en buena forma fisica, por o que no son claras encara as causas de l’accident.
