ARREDOL | A seisena edición d’o festival de mosica de carrera Tamborilé, plega iste sabado t’as plazas de Mezquita d’Exarc, en as Cuencas Meneras. O programa, que se fació publico fa bells diyas, achunta mosicos de tot lo mundo, dende Nueva York dica Teruel.
O maitin prencipiará con un taller, como ye cutiano en iste festival. En iste caso serán Swingdigentes, venius de Madrit, qui lo menarán. Continará a mosica d’o Coro Juravca (Rumanía – Euskal Herria), Residual gurus (Barcelona) y a mosica de Swingdigentes atra vegada.
T’a tarde, os mosicos de Abaraka, de Teruel, continarán a chornada, con a companyía de Magicaboola (Toscana), Hungry March Band (Nueva York), Brincadeira (Barcelona), Perhaps Contraption (Londra) y Lokomotores (Valladolit). De nueitz tornarán os mesmo mosicos en unatra sesión, dica que os cuerpos aguanten.
Antimás, como en anteriors edicions bi habrá zona d’acampada, servicio de chentas y cenas y mercau d’artesanía. Tamién se torna a fer, por tercer anyada, o concurso de Fotografía, y s’entregará o premio a o tamboriler de l’anyo, que en a edición pasada replegoron os organizadors d’o Festival Haizetara de Amorebieta-Etxano.
Todas as actuacions son de baldes. A información sobre o festival se puede trobar en a pachina web d’o Tamborilé.