ARREDOL | “MasterChof, o concurso que no quieren que veigas” asinas anuncia a organización sin animo de lucro Albeitars Sin Mugas (VSF Justicia Alimentaria Global) a suya nueva producción, que fa parte d’a campanya CortoCircuito “por una alimentación sana, amanada y chusta”, qualo obchectivo ye empentar os mercaus alimentarios locals en l’estau espanyol, favorecindo iniciativas de compra publica de birolla basada en una producción local y familiar.
A fin de MasterChof ye denunciar o sistema alimentario dominant, mas que mas o sector d’a restauración colectiva publica (minchadors escolars, hespitals…, etc), ya que seguntes afirma la organización en a suya web “o modelo actual chenera beneficio solo que ta pocas interpresas de catering a costa d’a calidat de l’alimentación d’a población y d’o treballo en as zonas rurals”.
Albeitars Sin Mugas ye una asociación dedicada a empentar un modelo de desenvolique rural chusto en favor d’a Soberanía Alimentaria y chenerar en a sociedat una consciencia solidaria como enciete enta la transformación social.
