A Plataforma contra l’autopista electrica convocó ahiere una marcha entre o Pueyo de Marguillén y Capella, ta refusar a construcción d’una linia d’alta tensión entre Penyalba, L’Arnero y Isona. Más de 300 presonas marchoron entre as dos localidatz, remerando una marcha pareixida convocada fa 20 anyos contra l’allora nombrada Aragón-Cazaril. A marcha ha aplegau a buena parti d’os alcaldes y concellers d’a zona afectada, asinas como miembros de partius politicos, CHA, IU, Equo u Convergència Democràtica de la Franja, asinas como asociacions culturals y civils d’o territorio.
Seguntes a plataforma convocant, o que se desiche ye “a posibilidat de pervivencia d’os nuestros lugars, que con a construcción d’ista autopista electrica, estará muit menazada”. A infraestructura, seguntes a Plataforma, planteya “doble circuito de 400.000 voltios y torres de 65 metros d’altaria de promeyo”. A marcha ha recorriu parti d’o trazau planteyau por a linia, que pasa mesmo por zonas de Lugars d’Importancia Comunitaria (LIC). Dimpués de l’andada, y con a colaboración de carnicas de Graus, se fació una chenta popular en Capella. Tamién s’heba pensau de fer un testing de biodiversidat fotografico, con 6 fotografos d’a naturaleza, que recullioron con as suyas camaras parti d’a biodiversidat menazata por a linia d’Alta tensión.
A chornada remató con una charrada, que ha remerau tamién os incendios que agora son cremando a parti alta d’a redolada, y que seguntes la organización “podrían estar causaus por linias electricas”. En a charrada han participau alcaldes aragoneses y catalans de lugars que estarian afectaus por a construcción d’ista linia d’Alta Tensión.
Fuent: Arredol
